எதை செய்யலாம், எதை செய்யக்கூடாது...

பணி நியமனம் மற்றும் கல்வி நிறுவனங்களில் மாணவர் சேர்க்கை ஆகியவற்றில் முக்கிய பங்கு வகிக்கும் குழு கலந்தாய்வு என்ற முக்கிய செயல்பாட்டில், எதை செய்ய வேண்டும் மற்றும் செய்யக்கூடாது என்பதை தெரிய வேண்டியது அவசியம்.

செய்ய வேண்டியவை

* சர்ச்சைக்குரிய தலைப்புகள் குறித்த விரிவான தகவல்களை, தினசரி செய்திகள், தலையங்கங்கள் மற்றும் நிபுணர்களால் எழுதப்பட்ட கட்டுரைகள் ஆகியவற்றைப் படித்து சேகரித்து வைத்துக்கொள்ள வேண்டும்.

* நிகழ்ச்சிகளை ஒரு டைரியில் குறித்து வைத்துக்கொள்ள வேண்டும்.

* அடிப்படை மொழி இலக்கணம், உச்சரிப்பு மற்றும் வெளிப்படுத்தும் முறை போன்ற திறன்களை மேம்படுத்திக் கொள்ளவும்.

* முடிந்தளவு எளிய மொழி நடையிலேயே பேசவும்.

* லாஜிக் அடிப்படையில், உங்களின் விபரங்களை தொகுத்து வைத்துக்கொள்ளவும்.

* உங்களின் எதிரே அமர்ந்து பேசும் நபரை புன்முறுவலுடன் அணுகவும்.

* உங்களின் அணுகுமுறையில், பரந்த மனப்பான்மையோடு இருங்கள்.

* உங்களின் வாதத்திற்கு சரியான ஆதாரத்தைக் கொடுக்கவும்.

* சார்பற்றவராக இருக்கவும். சமநிலையைக் கடைபிடிக்கவும்.

* மற்றவர்கள் வெளிப்படுத்தும் சிறந்த கருத்துக்களை ஆமோதித்து பாராட்டவும்.

* நல்ல கவனிப்பாளராக இருக்கவும்.

* பொறுமையாகவும், அமைதியாகவும் பேசவும்.

* உங்களின் கருத்தை வலுவாக்க, பொருத்தமான மேற்கூறுகளையும், உதாரணங்களையும் எடுத்துக்கூறவும்.

* கூச்சப்பட்டு, அமைதியாக இருக்கும் நபர்களை, பேசுமாறு உற்சாகப்படுத்த வேண்டும்.

* அனைத்து உறுப்பினர்களையும் சுழற்சி முறையில் பார்க்கவும், ஒரு சிலரையே பார்த்துக்கொண்டிருக்க வேண்டாம்.

* உங்களின் உற்சாகத்தையும், மகிழ்ச்சியையும், உரையாடல் முழுவதும் தொடர் வேண்டும்.

* மிதமான நகைச்சுவையை கடைபிடிக்கவும்.

* உங்களின் உடல்மொழியை சோதித்து, சரிசெய்துகொள்ள வேண்டும்.

* யாரேனும் உங்களின் கருத்தைக் கேட்டால், அதை பேசுவதற்கான வாய்ப்பாக எடுத்துக்கொண்டு பேசவும். தவிர்க்க நினைக்க வேண்டாம்.

* ஒருங்கிணைந்து குழுவாக செயல்படுவதில் உங்களின் ஆர்வத்தை வெளிப்படுத்தவும்.

* பொறுமையாக இருக்கவும். ஆதிக்கம் செய்ய நினைக்க வேண்டாம்.

* குழு நன்மைக்கே முக்கியத்துவம் கொடுக்க வேண்டும். தனிப்பட்ட நன்மைக்காக அல்ல.

* முடிந்தளவிற்கு, உங்களின் கருத்துக்களை உதாரணங்களுடன் விளக்கவும்.

* நேர ஒழுக்கத்தை தவறாமல் கடைபிடிக்கவும்.

* நல்ல முறையில் ஆடை அணிந்திருக்க வேண்டும்.

* வெற்றி குறித்து நம்பிக்கையுடன் இருத்தல் வேண்டும்.

* பேசும்போது சரியான வேகத்திலும், தெளிவாகவும் பேச வேண்டும்.

* ஒரு மாற்றுக்கருத்தை தெரிவிக்க விரும்பினால், இந்த விஷயத்தை இந்த விதத்திலும் பார்க்கலாம் என்று சொல்லி, உங்கள் கருத்தை நயமாக விளக்க வேண்டும். 

எவற்றை செய்யக்கூடாது

* விவாதத்தின்போது உணர்ச்சி வசப்படக்கூடாது.

* வரட்டு விவாதத்தில் ஈடுபடக்கூடாது.

* தனி நபரையோ அல்லது குழுவையோ உதாசீனம் செய்யக்கூடாது.

* கொடுக்கப்பட்ட நேரத்தில் பெரும்பகுதியை நீங்களே எடுத்துக்கொள்ள நினைக்கக்கூடாது.

* பிறரின் கோபத்தை தூண்டும் வார்த்தைகள் அல்லது சைகைகளைப் பயன்படுத்தக்கூடாது.

* பேசும்போது, உணர்ச்சிவசப்பட்டு, டேபிளை தட்டக்கூடாது.

* மற்றவர்கள் பேசுவதை குறுக்கிட்டு தடுக்கக்கூடாது.

* குழுவில் யாரேனும் உங்களின் கருத்தை மடக்கும் விதமாக பேசினால், அவருக்கு சூடான பதிலடி தர வேண்டும் என நினைத்தல் கூடாது.

* பொறுமையாக நடந்துகொள்ள வேண்டும். யாரையும் ஆதிக்கம் செலுத்த நினைக்கக்கூடாது.

* அதிக சத்தமாக பேசக்கூடாது. அதற்காக குசுகுசுவென்றும் பேசக்கூடாது.

* You see, I mean, Ya Ya போன்ற சொற்களைப் பயன்படுத்தக்கூடாது.

* நீங்கள் குழம்பி விட்டீர்கள் என்பதை காட்டிக்கொள்ளக் கூடாது.

* குழுவில் வேறு நபர் சொன்ன கருத்தையே திரும்ப சொல்லக்கூடாது.

* நாகரீகமற்ற விஷயங்களை வெளிப்படுத்தக்கூடாது.

* உங்களின் கருத்து ஏற்கப்படவில்லை என்றறால், அதற்காக, கோபப்படக்கூடாது. ஏமாற்றமடையக்கூடாது.

Thanks dinamalar.com

இலக்கு நிர்ணயம் - சிந்திக்க வேண்டிய அம்சங்கள்!

நம்மை ஒரு பணிக்கு தகுதியான நபராக உருவாக்குதிலேயே நமது கல்வித்திட்டம் கவனம் செலுத்துகிறது. உயர்கல்வி மற்றும் அறிவைத் தேடுதல் என்பது தமக்கென, மேன்மையான நோக்கத்தைக் கொண்டிருந்தாலும், கல்வி நிறுவனங்களைப் பொறுத்தவரை, நடைமுறையில், பணி வாய்ப்புகளுக்கே முக்கியத்துவம் தரப்படுகிறது.

உங்களது கல்லூரி வளாகத்தை விட்டு, நீங்கள் செல்லும்போது, வாழ்க்கையைப் பற்றி ஒரு குறுகிய அணுகுமுறையுடனேயே இருக்கிறீர்கள். வளர்ச்சி, மேம்பாடு, உயர்வு, திறமை, அறிவு, அணுகுமுறை, தனித்தன்மை, வெற்றி, இலக்கு, கடமை, செயல்திறன், குணாதிசயம் மற்றும் செயல்பாடு போன்ற வாழ்வின் அனைத்து அம்சங்களையும், பணி என்ற ஒற்றை அம்சத்துடன் மட்டுமே நாம் ஒப்பிட்டு பார்க்கிறோம்.

நமக்கு சம்பாதிக்க வேண்டிய தேவை இல்லையெனில், நாம் ஏன் கல்விப் பட்டங்களையும், திறன்களையும் அதிகரித்துக் கொள்ள வேண்டும்? அதேபோன்று, வாழ்க்கையில், மகிழ்ச்சியாகவும், சவுகரியமாகவும் இருக்க விரும்பவில்லை என்றால், எதற்காக பணிபுரிய வேண்டும்? நமது பணியே, நமது வாழ்க்கையின் மிகப்பெரிய இறுதி திருப்தி எனும்போது, பிறகு, அந்த நிலைக்காக உங்களை தயார்செய்து கொள்வதைப் பற்றி நினைக்கக்கூடாதா? போன்ற பல கேள்விகள் எழுகின்றன.

நீங்கள் தனிமனிதராக வாழ்க்கையை நடத்துவீர்கள். பின்னர் உங்களுக்கென ஒரு குடும்பம் உருவாகும். உங்களுக்கான உறவுகள் விரிவடையும். வாழ்க்கையில், கடமை, சவால், அனுபவம், உணர்ச்சி நிலைகள் மற்றும் பொறுப்பு ஆகியவை ஏற்படுகின்றன.

ஒரு குடிமகனாக நீங்கள், உங்களின் அரசாங்கத்தை தேர்ந்தெடுக்க வாக்களிக்கிறீர்கள், வரி செலுத்துகிறீர்கள் மற்றும் சட்டத்தை மதிக்கிறீர்கள். அதேபோல் ஒரு குடும்ப உறுப்பினராக, உங்கள் குடும்பம், நிதி நிலைமை, முதலீடுகள் ஆகியவற்றைப் பற்றி நீங்கள் எப்போதும் சிந்திப்பதுடன், உங்களின் விடுமுறை நாட்களை கொண்டாடுவதைப் பற்றியும் திட்டமிடுகிறீர்கள். ஒரு பெற்றோராக, உங்கள் குழந்தையின் வாழ்க்கை மற்றும் எதிர்காலம் பற்றிய அனைத்து விஷயங்களையும் சிந்திக்கிறீர்கள் மற்றும் திட்டமிடுகிறீர்கள்.

மேற்கூறிய அம்சங்கள், ஒரு மனிதனாக, உங்கள் வாழ்க்கையில் முக்கிய இடத்தைப் பெறுகின்றன. இதன் வழியாகவே, நீங்கள், உங்களைச் சேர்ந்த மற்றவர்களின் வாழ்க்கையிலும் தாக்கம் ஏற்படுத்துவதோடு, நாட்டிற்கும், மனித குலத்திற்கும் உங்களின் பங்கை ஆற்றுகிறீர்கள். உங்களின் பணியைவிட, மேற்கூறிய அம்சங்கள், அதிக முக்கியத்துவம் பெறுகின்றன.

சமூக வளர்ச்சி

உங்கள் வாழ்க்கையின் இத்தகைய செயல்பாட்டு வளர்ச்சி சாத்தியக்கூற்றை அறிந்துகொள்வதை நோக்கிய உங்களின் முதல் சிறிய முயற்சியானது, உங்களின் தனிப்பட்ட மற்றும் சமூக இலக்குகளை வகுத்துக்கொள்வதற்கானது. உங்கள் இலக்குகளின் அர்த்தம் என்ன? என்று நீங்களே கேட்டுக் கொள்ளுங்கள்.

நீங்கள் சுயபரிசோதனையில் ஈடுபட தொடங்க வேண்டும். அடுத்த 5 அல்லது 10 ஆண்டுகளில் நீங்கள் என்னவாக இருக்கப் போகிறீர்கள் என்பதை திட்டமிட வேண்டும். இந்த திட்டமிடுதலில், ஒரு தனிநபர், சமூக உறுப்பினர், நாட்டின் குடிமகன், பெற்றோரின் பிள்ளை, ஒரு குழந்தையின் பெற்றோர், ஒரு சகோதரன் அல்லது சகோதரி மற்றும் அடுத்த தலைமுறைக்கான ஒரு வழிகாட்டி என்ற வகையில், உங்களுக்குள் உள்ள பலவித சமூகப் பரிமாணங்கள் உங்களிடம் தாக்கம் செலுத்தும்.

நீங்கள் யாராக அறியப்பட விரும்புகிறீர்கள்? மற்றும் எந்த விஷயத்திற்காக புகழடைய விரும்புகிறீர்கள்? உங்களுடைய குழந்தைக்கு எந்தவகையில் ஒரு நல்ல பெற்றோராக இருக்க விரும்புகிறீர்கள்? உங்கள் நாட்டிற்கு எப்படிப்பட்ட குடிமகனாக இருக்க விரும்புகிறீர்கள்? மற்றும் எது உங்களுக்கு நீடித்த திருப்தியைத் தரும்? போன்ற பலவாறான கேள்விகள் அலைமோதும்.

உங்களின் இலக்குகளைப் பற்றி, வாழ்வின் பல்வேறான அம்சங்களை யோசித்து, அதனடிப்படையில் எழுதி வைக்கவும். அத்தகைய இலக்குகளை அடைவதில் இருக்கும் உங்களின் பலம், பலவீனம், ஆற்றல், திறமை, சாத்தியக்கூறுகள், நெருக்கடிகள், ஆதரவு, வயது, குணாதிசயம் ஆகியவற்றை தெளிவாக அறிந்துகொள்ள வேண்டும். இலக்கு நிர்ணயித்தல் என்பது, ஒரு முழு செயல்பாட்டிற்கு தயாராதலின் இறுதி நிகழ்வு என்பதை நினைவில் கொள்ள வேண்டும்.

உங்களின் இலக்குகள் பிரமாண்டமானதாகவும், பிரமாதமானதாவும் இருக்க வேண்டியதில்லை. மாறாக, தெளிவானதாகவும், சாத்தியப்படக்கூடியதாகவும், நன்கு திட்டமிடப்பட்டதாகவும், சூழ்நிலைக்கேற்ப பொருந்தக்கூடியதாகவும் இருந்தாலே போதும். உங்களின் மிகச்சிறிய இலக்கு கூட, தேவைப்படும்போது எளிய அல்லது பெரிய முடிவுகளை நீங்கள் எடுக்கையில் மிகவும் உதவியாக இருக்கும்.

உதாரணமாக, உங்களின் தனிப்பட்ட இலக்குகளில் ஒன்று, உங்களுக்கான நோயற்ற, ஆரோக்கிய வாழ்வைத் தருவதாக இருக்கலாம். அத்தகைய இலக்கானது, நீங்கள் துரித உணவகம் செல்லும்போதோ, பீசா அல்லது பர்கர் ஆகியவற்றை சாப்பிட நினைக்கும்போதோ, உங்களுக்கு எச்சரிக்கை ஊட்டி, உங்களின் உடல் நலத்தைப் பாதுகாப்பாக வைத்திருப்பதில் உதவி புரியும்.

தற்போதைய உலகம், நிச்சயமின்மை, சிக்கல்கள், நெருக்கடிகள், ஆபத்துக்கள் மற்றும் மோசடிகள் நிறைந்தது. எனவே, நமது இலக்கானது, சரியாக அடையப்படுமா? என்பதை நம்மால் உறுதிசெய்ய இயலாத நிலையே உள்ளது. சுருக்கமாக சொல்வதானால், நமது வாழ்க்கை, நம் கையில் இல்லை என்று சொல்லும் நிலையே உள்ளது. நாம் எதிர்பாராத பல சம்பவங்கள் நடந்துவிடுகின்றன.

எனவே, உங்களின் இலக்குகளை நிர்ணயிக்கையில், சற்றே திறந்த மனதுடனும், ஒன்றுக்கும் மேற்பட்ட சாத்தியக்கூறுகளையும் மனதில்கொண்டே செயல்படவும். நீங்கள் நிர்ணயித்த இலக்கை நோக்கி செல்கையில், ஒரு எதிர்பாராத நிகழ்வு அதை அடையவிடாமல் உங்களை வழிமாற செய்துவிட்டாலும், மனம் தளர்ந்துவிடாமல், வேறொரு இலக்கை நிர்ணயித்துக் கொள்ளுமளவு, மனவலிமையையும், நெகிழ்வையும் அதிகப்படுத்திக் கொள்ள வேண்டும்.

தனிப்பட்ட மற்றும் சமூக வாழ்க்கைக்கான இலக்குகளை நிர்ணயிப்பதில், நீங்கள் ஈடுபடும்போது, உங்களுக்கே, உங்களைப் பற்றிய பல வித்தியாசமான புரிதல்கள் ஏற்படும். உங்களால், மற்றவர்களுக்கான அல்லது இந்த சமூகத்திற்கான நன்மைகளைப் பற்றி உணர்வீர்கள். "உங்களின் நலன் சமூகத்தின் நலனில் சார்ந்துள்ளது. சமூகத்தின் நலன், உங்கள் நலனில் சார்ந்துள்ளது". இதை மனதில் வைத்து, செயல்பட்டாலே போதும். சிறப்பான இலக்குகளை நிர்ணயித்துக் கொள்ளலாம்.

Thanks dinamalar

ஆறு நொடிகளில் வசீகரிப்பது எப்படி?

ஒருவரின் ரெஸ்யூமை மேலோட்டமாக ஆராய, ஒரு பணி வழங்குநருக்கு, சராசரியாக 6 விநாடிகள் மட்டுமே ஆகிறது. எனவே, அத்தகைய மிகக் குறுகிய காலஅளவிற்குள், பணி வழங்குநரின் கவனத்தைக் கவர்ந்து, வாய்ப்பைப் பெறுவது தனிக் கலை.

ரெஸ்யூம் தயாரித்தலுக்கென்று, ஒரு வழக்கமான முறை நெடுங்காலமாக பின்பற்றப்பட்டு வருகிறது. ஆனால் சமீப ஆண்டுகளில், அந்த முறையில் நிறைய மாறுதல்கள் வந்துவிட்டன. வேலைவாய்ப்பு சந்தையில் ஏற்பட்டுள்ள பெரிய மாற்றங்கள், ரெஸ்யூம் தயாரிக்கும் முறையையும் பெரியளவில் மாற்றிவிட்டன. கன்சல்டண்டுகளைப் பொறுத்தவரை, ஒரு நாளில், ஆயிரக்கணக்கான ரெஸ்யூம்களை கையாள்வதால், அவர்கள் நேரத்திற்கு முக்கியத்துவம் கொடுக்கிறார்கள்.

எனவே, உங்களின் ரெஸ்யூம், குறைந்த வினாடிகளுக்குள், கன்சல்டண்டுகளின் கவனத்தைக் கவரும் வகையில், ரெஸ்யூம் தயாரிக்கும் கலையைக் கற்றுக்கொள்ள வேண்டும்.

தொழில்நுட்ப சரிபார்ப்பு முறை

இன்றைய நிலையில், பொதுவாக, ரெஸ்யூம்கள், அப்ளிகேஷன் டிராக்கர் சிஸ்டம் மூலமாக, சோதிக்கப்படுகின்றன. அந்த நிலையைக் கடந்து, ஒரு ரெஸ்யூம் சென்ற பிறகுதான், அதை மனிதக் கண்கள் பார்க்கின்றன. எனவே, இந்த முதல் நிலையை உங்கள் ரெஸ்யூம் கடப்பதை உறுதிசெய்ய, சரியான keywords -ஐ உங்களின் ரெஸ்யூம் கொண்டுள்ளதா மற்றும் முறையான format -ல் உங்கள் ரெஸ்யூம் வடிவமைக்கப்பட்டுள்ளதா? என்பதை உறுதிசெய்துகொள்ள வேண்டும்.

Keywords என்பது, ஒரு குறிப்பிட்ட நிறுவனம் அல்லது தொழில்துறையில் பயன்படுத்தக்கூடிய மொழி நடையாகும். அவற்றில், துறை, திறன்கள், பதவி மற்றும் தேவையான கல்வித் தகுதிகள் போன்ற விபரங்கள் அடங்கும். Search filters, பணி தேவைகளுக்கு ஏற்ப, குறிப்பிட்ட keyword -களால் வடிவமைக்கப்பட்டிருக்கும். எனவே, சரியான இடத்தில் keywords பயன்படுத்தல், சரியான எண்ணிக்கையில் அவற்றைப் பயன்படுத்தல் போன்றவை, உங்கள் ரெஸ்யூமின் முக்கியத்துவத்தைப் பெருமளவில் அதிகரிக்கும்.

ரெஸ்யூம் தயாரிப்பானது, தொழில்நுட்ப முறையில் இருக்க வேண்டும். அப்போதுதான், தொழில்நுட்ப அடிப்படையிலான ரெஸ்யூம் ஆய்வில், அடுத்த நிலைக்கு செல்ல முடியும். தொழில்நுட்ப முறை தயாரிப்பு என்பது, சரியான fonts மற்றும் font வடிவமைப்பு ஆகியவற்றை பயன்படுத்துதலை உள்ளடக்கியதாகும். இதன்மூலம், search engine, உங்கள் ரெஸ்யூமை எளிதாக ஆராயும். Graphs, tables, pictures, special effects and fancy fonts ஆகியவற்றை கட்டாயம் பயன்படுத்த வேண்டாம். அப்போதுதான், எந்தவித சிக்கலுமின்றி, உங்களின் ரெஸ்யூம், அடுத்த நிலைக்குச் செல்லும்.

ஆறே நிமிடங்கள்தான்...

ஒருவரின் ரெஸ்யூமில், சில நொடிகளில், வேலை வழங்குநர் பார்க்கும் விஷயங்கள் என்னவெனில், விண்ணப்பதாரரின் இருப்பிடம், கடைசி 2 நிறுவனங்களில், அவர் வகித்த பதவிகள் மற்றும் கல்வித் தகுதிகள் போன்றவைதான். எனவே, இத்தகைய ஜீவாதாரமான விஷயங்கள், வேலை வழங்குநருக்கு எளிதில் கிடைக்கும்படி செய்தல் முக்கியம்.

பணி வழங்குநர்கள், ரெஸ்யூமை எவ்வாறு ஆராய்கிறார்கள் என்பதன் heap map -ஐ உருவாக்க, eye tracking தொழில்நுட்பம் பயன்படுத்தப்பட்டது. முக்கிய விஷயங்கள், ரெஸ்யூம் பக்கத்தின் இடதுபுறமாக, பெரிய எழுத்தில் இருக்கும் என்பதை, mapping ஏற்கனவே வெளிப்படுத்தியுள்ளது. எனவே, தேவையற்ற விஷயங்கள் இருந்தால், அவை தயவுதாட்சண்யமின்றி நிராகரிக்கப்பட்டு விடும்.

வெளிப்படுத்தும் திறன்கள்

உங்களுடன் தொடர்பை ஏற்படுத்திக்கொள்ள, பணி வழங்குநர்களைத் தூண்டும் விதமாக, ரெஸ்யூம் அமைய வேண்டும். குறிப்பிட்ட பணிக்குத் தேவையான திறன்களும், கல்வித் தகுதிகளும் உங்களிடம் உள்ளன என்பதை உங்களின் ரெஸ்யூம், தெளிவாகவும், எளிதாகவும் வெளிப்படுத்த வேண்டும்.

உங்களின் பிரதான பணித்திறனை முதன்மைப்படுத்தியிருக்க வேண்டும். இதைத்தவிர, உங்களின் மென்திறன்களும் சிறப்பான முறையில் தெரிவிக்கப்பட்டிருக்க வேண்டும். இந்த மென்திறன்கள்தான், உங்களின் சம அனுபவத்தையும், சமமான கல்வித்தகுதியையும் வைத்திருக்கும் ஒருவரிடமிருந்து, உங்களை வேறுபடுத்திக் காட்டும். இந்த மென்திறன்கள்தான், உங்களின் பதவி உயர்விலும் முக்கியப் பங்கை வகிக்கின்றன.

ரெஸ்யூமில் ஏற்படும் பொதுவான தவறுகள்

பழைய சாதனைகளை, ரெஸ்யூமில், திரும்ப திரும்ப குறிப்பிடுவதைத் தவிர்க்க வேண்டும். அதற்கு பதிலாக, சமீபத்திய சாதனைகள் மற்றும் அனுபவங்களுக்கு முக்கியத்துவம் கொடுக்க வேண்டும். நீங்கள் விண்ணப்பிக்கும் பணிக்கு பொருத்தமான தகுதிகள் உங்களுக்கு இருப்பதை, நீங்கள் சிறப்பாக தெரிவிக்க வேண்டும். ஏனெனில், பணி வழங்குநர்கள், அதற்குத்தான் முக்கியத்துவம் கொடுக்கிறார்கள்.

பெரியளவிலான எழுத்துக்கள், fancy fonts, எழுத்து மற்றும் இலக்கணப் பிழை ஆகியவற்றை தவிர்க்கவும். ரெஸ்யூம்களில், அடிக்கடி காணப்படும் சில முக்கிய தவறுகளாக சுட்டிக்காட்டப்படுபவை,கல்வித்தகுதி பற்றிய விளக்கப் பகுதியில், படிப்பை முடித்த ஆண்டுகள் குறிப்பிடப்படுவதில்லை. அதேபோல், பணி அனுபவம் பற்றிய விளக்கப் பகுதியில், மொத்த பணி அனுபவ ஆண்டுகள் குறிக்கப்படுவதில்லை.

ஆன்லைன் ரெஸ்யூம்

இந்த வகையில், சோஷியல் மீடியா முக்கிய இடம் வகிக்கிறது. ஏனெனில், இதுபோன்ற வசதிகளின் மூலம், விண்ணப்பதாரரைப் பற்றிய பல விபரங்களை, பணி வழங்கும் நிறுவனங்கள் அறிந்து கொள்கின்றன. இந்த சோஷியல் மீடியாவின் மூலமாக, ஒரு நிறுவனத்திலிருந்து, மற்றொரு நிறுவனத்திற்கு மாற விரும்பும் நபர்கள், அதிக வாய்ப்புகளைப் பெறுகிறார்கள். எனவே, Linkedin போன்ற தளங்களில், உங்களின் விபரங்கள் இருப்பதை உறுதிசெய்து கொள்ளுங்கள்.

பொருத்தமான keywords பயன்படுத்தி, உங்கள் ரெஸ்யூமை எளிதாக கண்டுபிடித்தலையும் மற்றும் அனைத்து முக்கிய விபரங்களும், அதில் தெளிவாக குறிப்பிடப்பட்டுள்ளதையும் உறுதிசெய்தல் அவசியம். இதன்மூலம், உங்களை, பணி வழங்குநர், கட்டாயம் தொடர்பு கொள்வதை உறுதிசெய்ய முடியும்.

ஆன்லைன் மதிப்பை தக்கவைத்தல்

உங்கள் பெயரில் Google search செய்து, விபரம் தெரிவிக்கும் இணைப்புகளை சரிபார்க்கவும். அந்த விபரங்களில், எவ்வித எதிர்மறை அம்சங்களும் இடம்பெறாமல் இருப்பதை உறுதிசெய்துகொள்ள வேண்டும். எனவே, உங்களின் விபரங்களை பதிவேற்றம்(upload) செய்யும் முன்பாக, ஒன்றுக்கு பலமுறை நன்றாக சரிபார்த்துக் கொள்ள வேண்டும். போட்டிகள் நிறைந்த வேலைவாய்ப்பு சந்தையில், சரியான ரெஸ்யூமே, ஒருவருக்கு சிறப்பான வாய்ப்புகளைப் பெற்றுத்தரும் என்பதை நினைவில் வைக்க வேண்டும்.

Thanks dinamalar

ஐடி துறையில் திறமையானவர்களுக்கு எப்போதுமே வேலை!

ஐ.டி., துறை, திறமையானவர்களுக்கு, எப்போதும் வாய்ப்பு தருகிறது. ஐ.டி., துறையில் மட்டும், ஆண்டுக்கு, 2.1 லட்சம் பேருக்கு வேலை கிடைக்கிறது. பி.இ., மெக்கானிக்கல் முடித்த பெண்களுக்கு, ஆண்களை விட, அதிக அளவில் வேலை காத்துக் கிடக்கிறது  என கல்வியாளர் ஜெயபிரகாஷ் காந்தி கூறினார்.

புதுச்சேரியில் நடந்த, "தினமலர்" வழிகாட்டி நிகழ்ச்சியில், எந்த கோர்சில் சேர்ந்தால், மாணவர்களுக்கு வேலை வாய்ப்பும், நல்ல எதிர்காலமும் கிடைக்கும் என்பது குறித்து, கல்வியாளர் ஜெயபிரகாஷ் காந்தி பேசியதாவது:

"இஇஇ" கோர்ஸ் படித்துக்கொண்டே, "கேட்" தேர்வு எழுதி தேர்ச்சி பெற்றால், பொதுத் துறை கம்பெனிகளில் வேலை கிடைக்கும். சிலர், சிவில் இன்ஜினியரிங் படித்தால், வெயிலில் நிற்க வேண்டும் என, ஒதுக்கி விடுவர். சிவில் இன்ஜினியரிங் படித்தவர்களுக்கு, அதிக வேலை வாய்ப்புள்ளது. இந்த கோர்ஸ் முடித்த உடன், பி.ஜி., படித்தால், கூடுதல் வேலை வாய்ப்பு கிடைக்கும். 

ஐ.டி., துறையில், போதுமான வளர்ச்சி, எப்போதும் இருந்து கொண்டே இருப்பதால், ஏராளமான வேலை வாய்ப்புகள் உள்ளன. கம்ப்யூட்டர் சயின்ஸ், ஐ.டி.,யையும் வேறுபடுத்தி, பார்க்கின்றனர். இரண்டுக்கும், பெரிய வித்தியாசம் இல்லை. ஐ.டி., துறை, திறமையானவர்களுக்கு, எப்போதும் வாய்ப்பு தருகிறது. ஐ.டி., துறையில் மட்டும், ஆண்டுக்கு, 2.1 லட்சம் பேருக்கு வேலை கிடைக்கிறது. 

பி.இ., மெக்கானிக்கல் முடித்த பெண்களுக்கு, ஆண்களை விட, அதிக அளவில் வேலை காத்துக் கிடக்கிறது. விகிதாச்சார அடிப்படையில், பெண்களுக்கு வேலை வழங்க வேண்டும் என்பதால், பி.இ., மெக்கானிக்கல் படித்த பெண்களுக்கு, வேலை காத்திருக்கிறது. தனியார் கம்பெனிகள், பி.இ., மெக்கானிக்கல் படிப்பில் சேரும் பெண்களுக்கு, "ஸ்காலர்ஷிப்" தருகின்றன. 

ஆரம்பத்தில், வேலை வாய்ப்புகள் குறைவாக இருந்தாலும், பின், அதிக அளவில் சம்பளம் கிடைக்கும் வேலைகள் கிடைக்கும். ஆராய்ச்சி மேற்கொள்ள, விரும்பும் மாணவர்களுக்கு, "பயோடெக் கோர்ஸ்&' ஏற்றது. பயோடெக் மட்டும் படித்தால் போதாது. எம்.டெக்., படிக்க வேண்டும். ஆராய்ச்சி மேற்படிப்புகளை, அமெரிக்கா உள்ளிட்ட, வெளிநாடுகளில் படித்தால், நல்ல எதிர்காலம் உண்டு.

ஏரோநாட்டிக்கல் இன்ஜியரிங் படிப்பிற்கு, மற்ற கோர்சுகளை விட வேலைவாய்ப்பு குறைவாகவே உள்ளது. ஏர்கிராப்ட் டெக்னாலஜி படிக்க அதிக செலவாகும். துபாயில், இதற்கான கோர்ஸ் உள்ளது. பி.இ., ஆர்க்கிடெக் கோர்சுக்கு, நல்ல எதிர்காலம் உள்ளது. பெண்கள் இந்த கோர்சை தேர்வு செய்து படித்தால், வேலை வாய்ப்பு அதிகம் உள்ளது.

எம்.பி.பி.எஸ்., படிப்பிற்கு, "கட் ஆப்" மார்க் ஏறிக்கொண்டே வருகிறது. இந்த ஆண்டு, டாக்டர் படிப்பில் சேர்வதற்கு, 197.5 மேல் இருந்தால் தான், "சீட்&' கிடைக்கும். இவ்வாறு ஜெயப்பிரகாஷ் காந்தி பேசினார்.

Thanks dinamalar