சைக்கிள் ஓட்டுவோம்

கடந்த 10 ஆண்டுகளுக்கு முன்பு வரை சைக்கிள்களின் பயன்பாடு பெருமளவில் இருந்தது. பள்ளி, கல்லூரி, பணிக்கு செல்வோர் அதிகளவில் சைக்கிள் பயணம் மேற்கொண்டனர். குறிப்பிட்ட தொலைவுக்கு சென்றுவர எளிமையான, சிறந்த வாகனமாக சைக்கிள் விளங்கியது. சைக்கிள்கள் செல்வதற்கென்றே சாலைகளில் தனிப்பாதை ஒதுக்கப்பட்டிருந்தது. ஆனால் தற்போது சாலைகளில் சைக்கிள்களை பயன்படுத்துவோரைக் காண்பதே அரிதாக உள்ளது.

அதற்கு மாறாக பைக், ஸ்கூட்டர், மொபெட் உள்ளிட்ட இரு சக்கர வாகனங்களின் பயன்பாடு பன்மடங்கு பெருகியுள்ளது. மேலும் அதிகரித்து வருகிறது. கார் மற்றும் இருசக்கர வாகனங்களின் விற்பனை ஒவ்வோர் ஆண்டும், முந்தைய ஆண்டைக் காட்டிலும் அதிகரித்த வண்ணமே உள்ளது. குறிப்பாக இரு சக்கர வாகனங்களின் விற்பனை பன்மடங்கு பெருகி வருகிறது.

சைக்கிளைக் காட்டிலும் இரு சக்கர வாகனங்களைப் பயன்படுத்துவதை ஒரு கெüரவமான செயலாகக் கருதும் மனப்போக்கும் இதற்கு ஒரு காரணமாகும். தன்னைச் சுற்றியுள்ளவர்கள் இருசக்கர வாகனங்களைப் பயன்படுத்தும்போது தான் மட்டும் சைக்கிளைப் பயன்படுத்துவது அவமானம் என நினைப்போர் அதிகம்.

சைக்கிள்கள் அதிகளவில் பயன்படுத்தப்பட்டு வந்த காலகட்டங்களில் போக்குவரத்து நெரிசல் மிகவும் குறைவாக இருந்தது. விபத்துகளும் குறைவாக இருந்தன. சைக்கிள் விபத்துகளில் ஏற்படும் காயங்களும் குறைவாகவே இருந்தன. ஆனால் இருசக்கர வாகனங்கள் அதிகரித்துள்ள இக்காலகட்டத்தில் அதற்கு நேர்மாறான நிலையே அதிகரித்துள்ளது. உதாரணமாக சாகசம் என்ற பெயரில் பொது இடங்களில் அதிவேகமாக பைக்குகளை ஓட்டிச் செல்வோரால் பலருக்கும் பாதிப்பு ஏற்படுகிறது. ஆனால் சைக்கிளில் சாகசம் செய்தாலும் அதுபோன்ற பெரிய பாதிப்பு ஏற்படுவது குறைவு.

தற்போது அமெரிக்க டாலருக்கெதிரான இந்திய ரூபாயின் மதிப்பு பெரும் வீழ்ச்சி கண்டு வருகிறது. இதில் முக்கியக் காரணமாக கூறப்படுவது இந்தியாவின் ஏற்றுமதியை விட இறக்குமதி பன்மடங்கு அதிகம் என்பதுதான். இந்தியாவின் இறக்குமதியில் கச்சா எண்ணெய் முக்கியப் பங்கு வகிக்கிறது. கச்சா எண்ணெயிலிருந்து கிடைக்கும் பெட்ரோல், டீசல் தேவை அதிகரித்து வரும் நிலையில், இருசக்கர வாகனங்களின் பயன்பாட்டினை ஒவ்வொருவரும் குறைத்துக் கொண்டால் பெட்ரோலின் தேவை குறையும். அதற்காக இருசக்கர வாகனங்களைப் பயன்படுத்தக்கூடாது என்பதல்ல. அவசிய தேவைக்கு அவற்றைப் பயன்படுத்தலாம்.

தற்போது அருகிலுள்ள கடைகளுக்குச் செல்வதற்கும், கோயில்கள் உள்ளிட்ட இடங்களுக்குச் செல்வதற்கும் கூட மோட்டார் சைக்கிள்களைப் பயன்படுத்துவோர் அதிகம். அதுபோல் சுமார் 2 முதல் 3 கி.மீ. தொலைவுக்குச் செல்ல இருசக்கர வாகனங்களைப் பயன்படுத்துகின்றனர். இது போன்ற இடங்களுக்கு சைக்கிள்களைப் பயன்படுத்தலாம். இதனால் பெட்ரோல் பயன்பாடு குறையும். அனைவரும் இதேபோன்று செய்தால் பெட்ரோலுக்கான தேவையும், செலவும் குறைந்து வீட்டுப் பொருளாதாரமும், நாட்டுப் பொருளாதாரமும் உயர வழி வகுக்கும்.

சுற்றுச்சூழல் பாதிக்கவும், புவி வெப்பமடையவும் முக்கியக் காரணமாக இருப்பது வாகனங்கள் வெளியிடும் கரியமில வாயு என்ற நிலையில், இருசக்கர வாகனங்களின் பயன்பாட்டினைக் குறைத்து சைக்கிள்களின் பயன்பாட்டினை அதிகரித்தால் வளிமண்டல அடுக்கில் கரியமிலவாயு கலப்பதை கணிசமாகக் குறைக்கலாம்.

முன்பு சைக்கிள் பயன்பாட்டின் போது சைக்கிளை ஓட்டிச் செல்பவர்களுக்கு போதிய உடற்பயிற்சியாகவும் இருந்தது. ஆனால் இருசக்கர வாகனங்களால் உடலுழைப்புக்கு வேலையில்லாமல் உடலில் கொழுப்புச்சத்து உள்ளிட்டவை அதிகரித்துள்ளன.

சைக்கிள்களைப் பயன்படுத்த அரசும், தனியார் நிறுவனங்களும் ஊக்குவிக்க வேண்டியதும் அவசியமாகும். சாலைகளில் சைக்கிளுக்கென்று தனிப்பாதை மிகவும் குறைவு. போக்குவரத்து வசதிக்காக மேம்பாலங்களும், ஒரு வழிப்பாதைகளும் அமைக்கப்பட்டுள்ளன. இவை இருசக்கர, நான்கு சக்கர வாகனங்கள் மற்றும் கனரக வாகனங்களின் வேகத்துக்கு ஏற்ப உள்ளதே தவிர சைக்கிள் ஓட்டுபவர்களுக்கு ஏற்றதாக இல்லை. அதுபோல் சில ஷாப்பிங் மால்களில் சைக்கிள் நிறுத்துவதற்கான பார்க்கிங் பகுதிகளே இல்லை. சைக்கிள்கள் உள்ளே செல்ல அனுமதி மறுக்கப்படுவதும் உண்டு. இதனால் சைக்கிள் ஓட்ட விரும்புபவர்களும் தயக்கம் காட்டும் நிலை உள்ளது.

பல்வேறு நற்செயல்களை வலியுறுத்தி விழிப்புணர்வுப் பிரசாரம் செய்யப்பட்டு, துண்டுப் பிரசுரம் வழங்கப்படும் நிலையில் சைக்கிள் பயன்பாட்டினை வலியுறுத்தியும் விழிப்புணர்வுப் பிரசாரம் மேற்கொள்ள அரசு, அரசியல் கட்சிகள், அமைப்பு சார்ந்த நிறுவனங்கள் உள்ளிட்டவை முயற்சிக்கலாம்.

இவ்வாறு சைக்கிள்களை ஒவ்வொரு வீட்டிலும் பயன்படுத்தத் தொடங்கினால் பொருளாதாரம், சுற்றுச்சூழல், உடல் ஆரோக்யம் ஆகியவற்றை மேம்படுத்தலாம். அதேசமயம் போக்குவரத்து நெரிசல், விபத்து உள்ளிட்டவற்றைக் குறைக்கலாம்.

ராஜா ராணி விமர்சனம்

‘மெளன ராகம்’ படத்தை பார்க்காதவர்கள் பார்க்கலாம்! மணிரத்னம், ‘ராஜா ராணி’ படத்தை பார்க்காமல் இருப்பது இப்படத்தின் இயக்குநர் அட்லீக்கும், தயாரிப்பாளர் ஏ.ஆர்.முருகதாஸ்க்கும் நன்மை பயக்கும்.

காதலிச்சு ஏதோ ஒரு வகையில் காதலர்கள் சேராமல் போய்விட்டால் அதன்பிறகு வாழ்க்கையே கிடையாது என நினைக்க கூடாது. அதற்கு பிறகு அமையும் வாழ்க்கையை, வாழ்நாள் முழுக்க சந்தோஷமாக கொண்டு செல்ல வேண்டும். காதல் ‌தோல்விக்கு பிறகும் வாழ்க்கை இருக்கு... காதலும் இருக்கு... என்ற கருத்தை புதிய கோணத்தில் சொல்லியிருக்கும் படம் தான் ராஜா ராணி. இந்த கதையை புதுமுகம் அட்லீ, அவ்ளோ அழகாக சொல்லியிருக்கிறார்.

கதைப்படி ஜான் எனும் ஆர்யாவுக்கும், ரெஜினா எனும் நயன்தாராவுக்கும், பெற்றோர் விருப்பத்திற்காக திருமணம் நடக்கிறது. திருமணம் நடந்தாலும் அவர்கள் கணவன் - மனைவியாக வாழ்வது கிடையாது. எலியும்-பூனையும் போல் எப்போதும் முறைத்து கொண்டு தான் இருக்கிறார்கள். ஒருநாள் இரவு நயன்தாராவுக்கு திடீரென வலிப்பு வர குடிபோதையில் இருக்கும் ஆர்யா, எப்படியோ அவரை ஆஸ்பத்திரியில் சேர்க்கிறார். அங்கு அவருக்கு கொடுக்கப்படும் சிகிச்சையை பார்த்து கண்ணீர் விடும் ஆர்யா அவர் மீது பாசம் கொள்கிறார். எதனால் இப்படி வலிப்பு ஏற்பட்டது என்று நயனிடம், ஆர்யா விசாரிக்கையில் பிளாஷ்பேக் விரிகிறது. நயன்தாரா ஏற்கனவே சூர்யா எனும் ஜெய்யை காதலித்து, பதிவு திருமணம் செய்யும் வேளையில் ஜெய் திடீரென அமெரிக்காவுக்கு சென்று அங்கு தற்கொலை செய்து கொண்டுவிட்டதாக வந்த தகவலால் அந்த அதிர்ச்சியில் இதுபோன்று ஏற்பட்டுவிட்டதாக சொல்ல, நயன் மீது ஆர்யாவுக்கு இன்னும் அன்பு கூடுகிறது.

இதுஒருபுறம் இருக்க ஆர்யா, நஸ்ரியாவை காதலித்து வீட்டுக்கு தெரியாமல் ஒரு கோயிலில் கல்யாணம் பண்ணி, மறுநாள் அவுட்டிங் போகும் போது எதிர்பாரா விதமாக நஸ்ரியா சாலை விபத்தில் உயிரிழக்கிறார். இதனால் ஆர்யாவும் இடிந்து போய் 4 வருடமாக நஸ்ரியா நினைப்பாகவே இருக்கிறார். ஆர்யாவின் காதல் கதையை கேட்டு நயன்தாராவுக்கும் அவர் மீது பாசம் ஏற்படுகிறது. ஆனால் இந்த பாசத்தை இருவருமே வெளிக்காட்ட நினைக்கும்போது ஒவ்வ‌ொரு முறையும் ஏதாவது ஒரு மிஸ் அண்டர்ஸ்டாண்டிங் இவர்களுக்குள் ‌ஏற்படுகிறது. இதற்கிடையே ஜெய், உயிரோடு இருக்க  கடைசியில் நயன்தாரா ஜெய்யுடன் இணைந்தாரா? அல்லது ஆர்யாவுடனேயே தனது வாழ்க்கையை தொடர்ந்தாரா? என்பது மீதிக்கதை!

ஆர்யா, ஜெய், நயன்தாரா, நஸ்ரியா என நான்கு பேர் இருந்தாலும் நால்வருக்கும் சமமான ரோல் கொடுத்துள்ளார் இயக்குநர். ஆர்யா வழக்கம் போல் தனக்கான பாத்திரத்தை கச்சிதமாக செய்துள்ளார்.

ஆர்யாவைக்காட்டிலும் ஒரு சில நிமிடங்களே வந்தாலும் அசத்தி விட்டார் ஜெய். பயந்தசுபாவம் உடைய ஜெய்யை, நயன்தாரா போனில் கலாய்க்கும் போது அவர் அழுவது தொடங்கி, கடைசி காட்சியில் ஆர்யாவை, ஏய்... போடா என்று சொல்லும் காட்சிகள் வரை தனக்கான ரோலை பக்காவாக பண்ணியிருக்கிறார் மனிதர்.

யாரடி நீ மோகினி படத்திற்கு பிறகு நயன்தாரா நடிப்பில் மிளிர்ந்திருக்கிறார். ஜெய்யுடனான ரொமான்ஸ் காட்சியிலும் சரி, கணவர் எனும் பெயரில் இருக்கும் ஆர்யாவுடன் எப்போதும் முறைத்து கொண்டு திரியும் காட்சிகளிலும் சரி முகத்தில் அவர் காட்டும் எக்ஸ்பிரஷன் சூப்பர். அதிலும் வலிப்பு ஏற்படும் போது, கண்ணின் கருவிழியே தெரியாத அளவுக்கு கண்ணில் அவர் காட்டும் நடிப்பு சூப்பர்ப்...!!

ஏய் ரிங்கா ரிங்கா... எனும் பாட்டுக்கு நைட்டியை மடித்து கட்டி, வாயில் டூத்பிரஸ் உடன் ஆடியபடி அறிமுகமாகும் நஸ்ரியா, தொடர்ந்து பிரதர் பிரதர்... என ஆர்யாவை கடுப்பேற்றும் காட்சிகளிலும் சரி, பின்பு அதே ஆர்யாவுடனான ரொமான்ஸ் காட்சிகளிலும் சரி கொள்ளை அழகு. ஒவ்வொரு காட்சிக்கும் முகத்தில் அவர் காட்டும் எக்ஸ்பிரஷன் ஆஸம்...!

வழக்கம்போல் சந்தானத்தின் டைமிங் காமெடிகள் தியேட்டரை அதிரவைக்கின்றன. சந்தானம் தவிர ஜெய்யின் நண்பராக வரும் சத்யன், நான் கடவுள் ராஜேந்திரன் உள்ளிட்ட எல்லோரும் பாத்திரமறிந்து பளிச்சிட்டிருக்கின்றனர்.

மணிரத்னத்தின் ‘மெளனராகம்’ ஸ்டைல் கதை என்றாலும், அதை இன்றைய காலத்துக்கு ஏற்ற மாதிரி ஸ்டைலாக கொடுத்து இருப்பதில் புதியவர் அட்லீ மிளிர்கிறார்.
‘‘உலகத்துல யாருமே மேட் பார் ஈச் அதரா பொறக்கிறது இல்ல; வாழ்ந்து காட்டுறதுல தான் இருக்கு’’,,‘‘நம்ம கூட இருக்குறவங்க நம்மள விட்டு போய்ட்டாங்கன்னா, நாமளும் போகணும்னு அவசியம் கிடையாது. என்னைக்காவது ஒரு நாள் நாம் ஆசப்பட்ட மாதிரி லைப் மாறும்’’ போன்ற வசனங்களுக்கு தியேட்டரே எழுந்து நின்று கை தட்டுகிறது.

ஆஸ்பத்திரியில், நயன்தாராவை சேர்த்திருக்கும்போது, டாக்டர் வந்து ஆர்யாவிடம், மனைவி பெயர் என்ன என கேட்கும்‌போது தெரியாது என்று ஆர்யா சொல்வதெல்லாம் ரொம்ப ஓவர். இதேபோல் ஜெய், நயன்தாராவை திருமணம் செய்ய ஒப்புக்கொண்டு பதிவு அலுவலகத்திற்கு வராமல், ‌சொல்லாமல் கொள்ளாமல் அமெரிக்கா பறப்பது ஏன், அதற்கான காரணத்தை ஒரு சில காட்சிகளிலாவது டைரக்டர் காட்டியிருக்கலாம், அட்லீஸ்ட்  நயன்தாராவுக்கு ஒரு போனாவது பண்ணியிருக்கலாம் உள்ளிட்ட ஒரு சில குறைபாடுகள் இருந்தாலும், ஜீ.வி.பிரகாஷ் குமாரின் அசத்தல் இசை, ஜார்ஜ் சி.வில்லியம்சின் ரம்மியமான ஒளிப்பதிவு, அந்தோணி எல்.ரூபனின் படத்தொகுப்பு உள்ளிட்ட ப்ளஸ் பாயிண்ட்டுகளுடன் ராஜா ராணி அழகிய ஓவியமாய் மிளிர்ந்து இருக்கிறது.

மொத்தத்தில், ‘‘ராஜா ராணி’’ - ரசிகர்களின் இதய அரண்மனையில் ‘மகுடம்’ சூடப்போவது நிச்சயம்!!

கோபப்படும் மாணவர் சமுதாயத்தை நல்வழிப்படுத்த சிறப்புப் பயிற்சி

எதற்கெடுத்தாலும் கோபம் வரக் கூடிய வகையில் மாணவர்கள் மாறி வருவதால் அவர்களுக்கு அந்த கோபத்தை குறைக்க வழி ஏற்படுத்தும் வகையில் அரசு சார்பில் ஆசிரியர்களுக்கு சிறப்பு பயிற்சி அளிக்கப்பட்டு அதன் மூலம் மாணவர்களுக்கு பயிற்சி அளிக்கும் புதிய திட்டம் நடைமுறைப்படுத்தப்படுகிறது.

இன்றைய மாணவ, மாணவிகளுக்கு அறிவு வளர்ச்சி அபரிவிதமாக இருக்கிறது. அதே அளவிற்கு கோபமும் இருப்பதாக கூறப்படுகிறது. இந்த கோபத்தினால் பல்வேறு விரும்பத்தகாத செயல்கள் நடந்து விடுகிறது. இதன் மூலம் மாணவ சமுதாயத்தின் மீது ஒருவித களங்கம் ஏற்படும் சூழ்நிலை உருவாகிறது.

முன்பெல்லாம் பள்ளிக்கு மாணவ, மாணவிகளை கொண்டு வந்து விடக் கூடிய பெற்றோர்கள் எங்கள் பிள்ளைகளை அடித்து சொல்லிக் கொடுங்கள் என்று கூறுவார்கள். கண்டிப்பு இருந்தால் மாணவ, மாணவிகள் மத்தியில் நல்ல கல்வியும், ஒழுக்கமும் ஏற்படும் என்பதற்காக அவர்கள் அவ்வாறு தெரிவித்தனர். ஆனால் இன்றைக்கு நிலமை தலைகீழாகி விட்டது.

ஆசிரியர்கள் மாணவர்களை எந்த காரணம் கொண்டும் அடிக்க கூடாது. வகுப்பறையில் பிரம்பு என்பது இருக்கவே கூடாது. மாணவர்களின் மனநிலைக்கு ஏற்ப ஆசிரியர்கள் மாறிக் கொண்டு கல்வி கற்றுக் கொடுக்க வேண்டும் என்று அரசு உத்தரவிட்டுள்ளது. 

இதனால் எந்த ஆசிரியரும் இன்றைக்கு மாணவர்களை கண்டிப்பதில்லை. அரசின் உத்தரவால் கண்டிப்பு இல்லை என்கிற நிலையில் பல்வேறு விரும்பதகாத செயல்கள் நடக்கும் வாய்ப்பு அதிகமாக ஏற்பட்டு வருவதாக கண்டறியப்பட்டுள்ளது.

இன்றைக்கு பள்ளி மாணவர்கள் மத்தியில் அதிகமாக கோபம் வருகிறது. இந்த தகவல் அரசுக்கு சென்றதை தொடர்ந்து தற்போது சமுதாய விழிப்புணர்வு மற்றும் பல்லூடக பாதுகாப்பு என்னும் தலைப்பில் ஆசிரியர்களுக்கு பயிற்சி அளிக்க அரசு உத்தரவிட்டுள்ளது.

இந்த பயிற்சியை பெறும் ஆசிரியர்கள் மாணவர்களிடத்தில் அதனை தெரிவிக்கும் வகையில் ஏற்பாடு செய்யப்பட்டுள்ளது. மாநில கல்வியியல் ஆராய்ச்சி மற்றும் பயிற்சி நிறுவனமும், அனைவருக்கும் கல்வி இயக்கமும் இணைந்து இந்த பயிற்சியை அனைத்து மாவட்டங்களிலும் நடத்துகிறது.

தூத்துக்குடியில் சி.வ. அரசு தொடக்கப்பள்ளியில் நடந்த பயிற்சியினை அனைவருக்கும் கல்வி இயக்க கூடுதல் சி.இ.ஓ சரோஜா துவக்கி வைத்தார். ஆசிரியர்களுக்கு பயிற்சி அளித்த கருத்தாளர்கள் தெரிவித்த விபரம் வருமாறு:

மாணவர்கள் மத்தியில் இன்றைக்கு கோபம் மிக அதிகமாக வருகிறது. அந்த கோபம் கல்லூரி முதல்வர் கொலை வரைக்கு செல்கிறது. மாணவ பருவத்திலே இதுபோன்ற கோபம் அவர்களுக்கு வருவது ஏன் என்பதை ஆய்வு செய்ய வேண்டியது அவசியம். ஆசிரியர்கள் தான் மாணவர்கள் இதுபோன்று படக் கூடிய கோபத்தை குறைக்க அவர்களுக்கு அறிவுரை வழங்க வேண்டும்.

கம்ப்யூட்டர், டிவியில் மூழ்கலாமா?

இன்றைக்கு இண்டர்நெட், இமெயில், செல்போன், பேஸ்புக், சார்டிங் என்று பல்வேறு நவீன தொழில் நுட்பங்கள் வந்து விட்டன. மாணவ, மாணவிகளில் பலர் கம்ப்யூட்டரில் மூழ்கி கிடக்கும் நிலை ஏற்படுகிறது. சிலர் டிவியில் மூழ்கி கிடக்கும் நிலை உருவாகிறது. இந்த நிலையை மாற்ற வேண்டும்.

சமூகத்தின் பங்கு

சமூகம் என்றால் என்ன, அதில் நம் பங்கு என்ன என்பதை மாணவர்களுக்கு ஆசிரியர்கள் தெளிவாக தெரிவிக்க வேண்டும். பொதுவான விபரங்கள் அனைத்தும் மாணவர்களுக்கு தெரியும் வகையில் அதனை ஆசிரியர்கள் கற்றுக் கொடுக்க வேண்டும்.

ஆபத்து... ஆபத்து...

ஆம்புலன்ஸ் சேவை, 108 போன்றவற்றை தெரிந்து கொள்ள செய்ய வேண்டும். சில சேனல்களில் வரக் கூடிய ஆபத்தான விளையாட்டு போன்றவற்றை பார்த்து அதனை செய்து பார்க்க வேண்டும் என்று சிலர் நினைக்கின்றனர். அதுபோன்ற சேனலை பார்க்க கூடாது என்று அறிவுரை வழங்க வேண்டும்.

பேஸ்புக்

தங்களது போட்டோக்களை இனம் தெரியாத நபர்களுக்கு பேஸ்புக் மூலம் அனுப்ப கூடாது. எஸ்.எம்.ஏ.ஆர்.டி என்கிற சேப்டி, மீட், அஸ்பெட்டிங், ரிலையபிள், டெல் ஆகியவற்றை தெளிவாக மாணவர்களுக்கு ஆசிரியர்கள் கற்றுக் கொடுக்க வேண்டும்.

சேப்டி என்கிற போது கம்ப்யூட்டரில் பல்லூடக தொடர்பில் (சேட்டிங்)

சொந்த தகவல்களை பிறரிடம் பரிமாறிக் கொள்ளாமல் (சேப்) பாதுகாப்பாக இருக்க வேண்டும். இமெயில் முகவரி, போட்டோ, செல்போன் எண், பள்ளியின் பெயர் போன்ற தகவல்களை தெரிவிக்க கூடாது.

மீட் என்கிற போது பல்லூடகத்தின் வழியே அறிமுகமில்லாத ஒருவரை சந்திக்க நேரிடுவது மிகவும் ஆபத்தானது. பெற்றோர், பாதுகாவலரின் துணையுடன் தான் செய்தல் வேண்டும்.

இ-மெயில் இன்னல்கள்

 

அக்ஸ்செப்ட்டிங் என்கிற போது அறிமுகம் இல்லாதவர்களின் இமெயில் தகவல்கள், போட்டோக்கள் ஆகியவற்றை ஏற்றுக் கொள்வது பிரச்னைகளை உண்டாக்கிவிடும். இந்த தகவல்களை வைரசாக தேவையில்லாத தகவல்களாக இருக்கலாம்.

ரிலையபிள் என்கிற போது தகவல்களை பல்லூடகத்தில் பார்க்க நேரிடும் போதும், உண்மை தகவல்களா, நம்பகத்தன்மையான நபர்களா என்பதை உறுதி செய்து கொள்ள வேண்டும்.

டெல் என்கிற போது அசவுகரியமான, துன்பப்படும் படியான செயல்களை பல்லூடகம் வாயிலாக உங்களுக்கு ஒருவர் கொடுக்கும் போது உடனடியாக பெற்றோர், பாதுகாவலர், நம்பகத்தன்மையான, உண்மையான நபர்களிடம் தெரிவிக்க வேண்டும்.

இதுபோன்ற தகவல்களை மாணவர்களுக்கு ஆசிரியர்கள் தெரிவிக்க வேண்டும். இது தான் இந்த பயிற்சியின் முக்கிய நோக்கமாகும். 

உற்சாகமாக செயல்படலாம் வாருங்கள் இளைஞர்களே...

பள்ளி மாணவர்களாக இருந்தாலும், கல்லூரி மாணவர்களாக இருந்தாலும், வேலைக்குப் போகும் இளைஞர்களாக இருந்தாலும் சோம்பல், நேர மேலாண்மை, கட்டுப்பாடு போன்றவற்றில் தளர்ச்சி அதிகமாகவே காணப்படுகிறது. இந்த மூன்றும் சேர்ந்து இறுதியில் ஒழுக்கச் சீர்கேடுக்கும் அழைத்துச் செல்கிறது.

தனி மனித ஒழுக்கம் சார்ந்த விஷயமாக இது பார்க்கப்பட்டாலும் இதனால் சமூகத்திற்கும் பாதிப்பு ஏற்படுகிறது என்பதுதான் உண்மை. எனவே தனிமனித நடவடிக்கைகளை சுறுசுறுப்புள்ளதாகவும், அர்த்தமுள்ளதாகும் மாற்ற வேண்டிய பொறுப்பு அனைவருக்கும் உள்ளது.

மேலும் இளைஞர்கள் சோம்பலினாலும், கட்டுப்பாடின்மையாலும்  தாங்கள் இழந்தவற்றை அறியாதவர்களாக, எதையுமே சாதாரணமாக எடுத்துக் கொள்ளும் நிலையில் இருக்கிறார்கள். இது போன்ற நிலையை மாற்ற வேண்டும்.

நேர மேலாண்மை

பள்ளிக்கூடமும், கல்லூரியும், அலுவலகங்களும் செயல்படுவதற்கு ஒரு குறிப்பிட்ட கால அளவானது கொடுக்கப்பட்டிருக்கிறது. அந்த நேரத்திற்குள்ளாக செல்லவில்லையென்றால் தண்டனைகளும், அபராதங்களும் விதிக்கப்படுகின்றன. அந்த பாதிப்பினை கருதியே சரியான நேரத்திற்கு சென்று விடுகிறோம்.  

அதே போன்று தினமும் தூங்கும் நேரத்தையும், காலையில் எழும் நேரத்தையும் திட்டமிட்டு அதன்படியே உறங்கி எழுந்தால் அதுதான் வெற்றிக்கான ஆரம்பம்.

உணவு

சத்தான உணவை தேடித்தேடி உண்ண வேண்டும். ருசியான உணவிற்கு நாவினை அடிமையாக்காமல் சத்தான உணவிற்கு நாவையும், மனதையும் பழக்கப்படுத்த வேண்டும்.

திண்பண்டங்கள்

மைதா மாவு கலந்த பப்ஸ், சமோசா, பிஸ்கட், பீசா போன்றவற்றோடு சிப்சையும் தவிர்க்க ஆரம்பியுங்கள். அதற்கு பதில் அந்த நேரத்தில் பட்டாணி, கடலை போன்ற உணவுகளை மாற்று உணவாக உண்ண ஆரம்பியுங்கள்.

தீய பழக்கங்கள்

புகைப் பிடித்தல்

கல்லூரி மாணவரிடையே புகை பிடிக்கும் பழக்கம் அதிக அளவில் உள்ளது. புகைப் பிடிக்க வேண்டும் என எண்ணும் நேரங்களில் எல்லாம் அதனால் விளையும் தீமைகளையும், செலவையும் நினைவில் கொண்டு வருவதற்கு முயற்சி செய்யுங்கள். அந்த நேரத்தில் பபிள்கம் அல்லது இனிப்பு மிட்டாய்களை சாப்பிடுங்கள். உங்கள் மனநிலை புகையை மறக்க ஆரம்பிக்கும்.

குடிப்பழக்கம்

இளம் மாணவர்களிடையே அதிகரித்து வரும் மற்றொரு மோசமான பழக்கம் மது அருந்தும் பழக்கம். மிகவும் மோசமான, ஒரு கொடிய பழக்கமான இதனை விளையாட்டாக ஆரம்பித்து பிறகு விட முடியாமல் தவிக்கின்றனர்.

தவிப்பை நீக்கி மகிழ்ச்சி கொள்வதற்கு மது அருந்தும் சூழல் வரும் போதெல்லாம் இருக்கும் பணத்தைக் கொண்டு நன்றாக சாப்பிடலாம் என மனதை திசை திருப்புங்கள். தினமும் கொய்யாப் பழம் சாப்பிடுங்கள். பொருளாதார இழப்பையும், உடல் நல பாதிப்பையும் நினைத்துப் பாருங்கள். குடிப்பழக்கம் உள்ளவர்களைப் பார்த்து "எதிர்காலத்தில் அவர்களை விட நான் நல்ல உடல்நலத்துடன் வாழ்வேன்" என உங்களுக்குள்ளே தினமும் சொல்லிக் கொள்ளுங்கள்.

சேமியுங்கள் 

பணம் எப்பொழுதும் கையிலிருந்தால் அது தன்னை செலவழிக்க உங்களை தூண்டிக் கொண்டே இருக்கும். அதனால் பணத்தை உங்களுக்கென வங்கிக் கணக்கை ஆரம்பித்து சேமிப்பு கணக்கில் செலுத்துங்கள். அதே போன்று ஏ.டி.எம். அட்டையை எப்பொழுதும் சட்டைப் பையிலேயே வைத்திருக்காதீர்கள்.

ஒரு நாளைக்குத் தேவையான பணத்தை மட்டும் வைத்திருங்கள். அப்பொழுதுதான் ஏதாவது செலவு செய்ய வேண்டும் என்றாலும், பணம் இல்லையே என்று அந்த செலவை தவிர்த்து விடுவீர்கள்.

நல்லதையே நினையுங்கள்

நல்ல நினைவுகளே உங்களை உற்சாகமாக வைத்திருக்கும். உற்சாகம் இல்லாத மனதுதான் கவலை கொள்ளும். எதையும் பதட்டத்தோடு அணுகாதீர்கள். "நமக்கென்று ஒரு இடம் இருக்கிறது, அது நம்மை விட்டு எங்கும் போகாது" என்று சோர்ந்து போகும் நேரமெல்லாம் நினையுங்கள்.  

வெற்றிகரமான நேரங்களில் எல்லாம் "இதை விட மேலான வெற்றிகளை சந்திக்க வேண்டியிருக்கிறது, இது சாதாரணமானது தான்" என மனதை நிலையாக வைத்திருங்கள். 

சின்ன சின்ன விஷயங்களில் காட்டும் அக்கறையும், ஆர்வத்தோடு செயல்படுவதும் பெரிய செயல்பாடுகளில் வெற்றிகரமாக நம்மை இயங்க வைக்கும். வாழ்க்கை நிம்மதியும், மகிழ்ச்சியும், வெற்றியும் கலந்த ஒன்றாக மாறும்.