நடப்பது நன்மைக்கே

ஆட்டோ ஒன்றின் பின்புறத்தில், "யாமிருக்க நடை ஏன்?' என எழுதப்பட்ட வாக்கியம் கண்ணில்பட்டது. பக்தி மணம் கமழும் வாசகம் ஒன்றை அடியொற்றி, ஆட்டோ பயணத்துக்கேற்ப வாசகம் எழுதிக்கொண்ட அந்த ஓட்டுநரின் வார்த்தை ஜாலம் ரசிக்கவைத்தது.

சில மாதங்களுக்கு முன்புவரை ஆட்டோக்களில் எவ்வளவு பணம் கேட்பார்களோ என்ற பயத்துடனேதான் பயணம் செய்ய வேண்டியிருந்தது. இப்போது கட்டணம் நிர்ணயிக்கப்பட்டுவிட்டதால் கொஞ்சம் நிம்மதியுடன் ஏற முடிகிறது.

மேலும், ஏறக்குறைய ஆட்டோ கட்டணத்துக்கே அழைத்துச் செல்ல கால் டாக்ஸிகளும் வந்துவிட்டன. இதனால், இப்போதெல்லாம் அடிக்கடி கால் டாக்ஸியில், அதுவும் சில நேரங்களில் ஏசி கால் டாக்ஸியில் பயணம் செய்ய முடிகிறது.

எல்லோருமே நடக்கத் தொடங்கிவிட்டால் ஆட்டோ, கார், கால் டாக்ஸி என தங்கள் வாகனங்களை நம்பி வாழ்க்கை நடத்துவோரின் நிலை திண்டாட்டம்தான்.

இருந்தபோதிலும், ஆட்டோ, கார்களை மட்டுமல்லாமல், இருசக்கர வாகனங்களையும் அவசரத்துக்கோ, அத்தியாவசியத்துக்கோ மட்டும் பயன்படுத்திக்கொண்டு மற்ற நேரங்களில் முடிந்தவரை நடந்து செல்லும் பழக்கத்தை ஏற்படுத்திக் கொள்வதே சாமானிய மக்களின் உடல் ஆரோக்கியத்துக்கு (பர்ஸூக்கும்) நல்லது.

பொதுவாக, உடல் நலத்துக்குத் தேவையானவற்றை நம்மைவிட்டுத் தள்ளிவைப்பதே பேஷன் என்றாகிவிட்டது. "ஊருடன் ஒத்துவாழ்' என்பதைக் கடைப்பிடிக்க வேண்டியுள்ளதால், நாமும் சமுதாய ஓட்டத்துக்கு ஈடுகொடுத்து நடக்க வேண்டியதாகிவிடுகிறது.

உணவு, உடை, உடல் ஆரோக்கியம் போன்றவற்றில் நன்மை தருபவற்றைவிட, எது பாதகமானதோ அவற்றையே விரைந்து பின்பற்றி நடக்கப் பழகி விடுகிறோம்.

எண்ணெய்ப் பலகாரங்கள், துரித உணவு, எப்போதும் நொறுக்குத் தீனி, எதற்கெடுத்தாலும் குளிர்பானம் என, பெரியவர்கள் உண்பதைப் பார்த்து குழந்தைகளும் அதற்குப் பழகிவிடுகின்றனர். "அடிக்கடி நொறுக்குத் தீனி; ஆரோக்கியத்தை நொறுக்கும் தீனி' என்பதை நாம் எண்ணிப்பார்த்து நடப்பதில்லை.

இளமை முதலே சுறுசுறுப்பாக நடக்காமல், ஒரே இடத்தில் இருந்தே பழகிவிட்டால், முதுமையில் ஒவ்வொரு நோய்க்கும் ஒவ்வொரு மருத்துவமனையாய் தேடித்தேடி நடக்க வேண்டிய நிலை ஏற்படலாம்.

அதற்காக, அசை போட்டுக் கொண்டோ, வயிறு புடைக்க உண்டு விட்டோ, காலைக் கடன்களைக் கழிக்காமலோ "கடனே' என நடைப் பயிற்சி மேற்கொள்வது தவறு. முறையான நடைப் பயிற்சியே நல்லது.

நடைப் பயிற்சிக்குச் செல்லும் பலர் தங்களது நாயைத் தங்களுடன் அழைத்துச் செல்வர். சிலர் தங்கள் மனைவியையோ அல்லது நண்பரையோ அழைத்துச் செல்வதுண்டு.

சில தனிமை விரும்பிகளோ தங்களது தொப்பையை மட்டுமே துணைக்கு அழைத்துச் செல்வதுண்டு. நாயும் நண்பர்களும் நாம் அழைத்தால்தான் வருவார்கள். தொப்பையோ அழைக்காமலே கூடவரும்; எது எப்படியாயினும் நடப்பது நல்லது.

நாள்தோறும் நடைப் பயிற்சியில் ஈடுபட்டால் உடல் வலிமை பெறுவதுடன் மனதுக்குத் தேவையான சக்தியும் கிடைக்கிறது.

நாள்தோறும் இப்பயிற்சியில் ஈடுபட முடியாதவர்கள் வாரத்தில் ஐந்து நாள்கள் நடந்தால்கூட போதுமானது. ரத்த ஓட்டம் சீரடையும். நரம்பு மண்டலம் சுறுசுறுப்படையும். நாளமில்லா சுரப்பிகள் புத்துணர்வடையும். அதிகப்படியான கலோரிகள் எரிக்கப்படுகிறது. முதுகு நரம்புகள், எலும்புகள் உறுதிப்படுகின்றன. வயிற்றுத் தொப்பை குறைகிறது.

மாரடைப்பு வரும் அபாயமும், கெட்ட கொழுப்புத்திறனும் சர்க்கரையின் அளவும் குறையும். ஆழ்ந்த தூக்கம் வரும். நல்ல கண் பார்வை கிடைக்கும். எல்லாருமே நாள்தோறும் சுமார் நாற்பத்தைந்து நிமிடங்கள் நடக்கலாம்.

காலாற நடப்பதில் இத்தனை நன்மைகள் கிடைக்கின்றன. இத்தனை விஷயங்களையும் பட்டியலிட்டு, நிபுணர்கள் உத்தரவாதம் அளித்த பிறகும் நடைப் பயிற்சியை தொடங்காமலிருக்கலாமா?

ஆனாலும், "நடப்பது நடக்கட்டும், நாம் ஏன் வீணாக நடக்க வேண்டும்' என எண்ணுவோரும் இல்லாமலில்லை. எதுவும் நடந்தபின்னர் நினைத்துத் தவிப்பதைவிட, முன்னெச்சரிக்கையுடன் நடக்கும் முன்பே உணர்ந்து "நடப்பதுதானே' நல்லது?

By மா. ஆறுமுககண்ணன்

ஆசிட்- முதலுதவி!

பெண்களைக் குற்றம் சொல்லாதீர்கள், உங்கள் வீட்டில் இருக்கும் ஆண் பிள்ளைக்களைக் கண்டித்து வளருங்கள்' சுதந்திர தின விழா உரையில் நாட்டின் பிரதமர் உரைத்த வைர வரிகள் இது.டெல்லியில் பதின் பருவ பெண் மீது நடந்த பாலியல் வன்முறைக்குப் பிறகு, இந்தியாவுக்கு வரும் சுற்றுலா பயணிகள் குறைந்துவிட்டனர் என்று இந்தியாவின் சுற்றுலாத்துறையினர் அறிக்கை சமர்ப்பிக்கின்றனர். இந்தியாவில் நொடிக்கும் ஆறு பெண்கள் வதைக்கபடுகின்றனர் என்று ஆய்வுகள் கூறுவதாகத் தொலைக்காட்சிகளில் ஒளிப்பரப்பாகின்றன. தமிழகத்தில் வினோதினி, வித்யா என்று ஆசிட் வீச்சால் பாதிக்கப்பட்டவர்களின் பட்டியல் நீண்டு கொண்டேயிருக்கிறது.

"நம் தெருவைச் சுத்தமாக வைத்துக்கொண்டால், இந்த நாடு தானாகச் சுத்தமாகும் என்பார்கள். அந்த வகையில் இனி, ஆசிட் வீச்சால் எந்தப் பெண்ணும் வாழ்க்கையை இழக்கக்கூடாது. இதற்கு அனைத்து இளைஞர்களும் ஒன்றுபட வேண்டும். இதுவே என் விருப்பம்" எனச் சமுகத்தின் மீதான அக்கறையோடு ஆரம்பிக்கிறார் ஒட்டுறுப்புச் சிகிச்சை நிபுணர் (Plastic Surgeon) வி.எஸ்.ராதா கிருஷ்ணன்.

"ஆசிட் வீசுபவருக்கு அந்த ஆசிட் தன்மையோ, அதன் பெயரோ கூடத் தெரியாது. சுற்றமும், தவறான நட்புமே அவர்களை இந்தக் கொடூரமான செயல் தூண்டுக்கிறது. அதிலும், பெரும்பானவர்கள் பயன்படுத்துவது பாத்ரூமிலும், கம்பெனிகளிலும் பயன்படுத்தும் ஆசிட் வகைக்களே. ஆசிட் மட்டும் அல்லாமல் அல்கலின் (alkaline) எனப்படும் கார வகைகளையும் பயன்படுத்துகின்றனர்.

சில ஆசிட், கார வகைகளின் வீரியம், மிகவும் அதிகம். பொதுவாகவே, இந்த ஆசிட் வகைகள் தோலில் பட்டால், தோலில் டெர்மிஸ் (termis) எனப்படும் சரும பகுதியைச் சேதப்படுத்தி, தோலில் இருக்கும் புரதம் முழுவதையும் உறிஞ்சிவிடும். இதனால், தோலில் சுருக்கங்கள் ஏற்படும்.மேலும் தோலைத் தாண்டி நரம்புகளைப் பாதிப்பதாலும் தீராத வலி ஏற்படும்.

இதில், நரம்புகள் பழுதடைந்தால் வலி அதிகம் இருக்காது. நரம்புகள் வெளியில் தெரிவது போன்ற நிலை வந்தால் அதன் வலி பயங்கரமாக இருக்கும். பொதுவாக எல்லாப் பிரச்னைகளுக்கும் முதலுதவி என்பது அந்த நோய் பெரிதாகாமல் வலியைக் குறைக்கவே உதவும். ஆனால், ஆசிட் வீச்சைப் பொறுத்தவரை செய்யும் முதலுதவியே 90 சதவிகித வீரியத்தைக் குறைத்துவிடும். கிட்டத்தட்ட இதை முதலுதவி என்பதைவிட 'டீரிட்மென்ட்' என்றே கூறலாம்" என்ற டாக்டர் ராதா கிருஷ்ணன், ஆசிட் பட்டவுடன் செய்ய வேண்டிய அவசர முதலுதவி குறித்து விளக்கினார். 

* ஆசிட் வீசியவுடன் வீசிய பகுதியில் தண்ணீரை பாய்ச்ச வேண்டும். அது குளிர்ந்த நீராக இருந்தால் மிகவும் நல்லது. ஏனெனில் தண்ணீர் ஊற்றும் போது வலி தீவிரமாக இருக்கும். குளிர்ந்த நீர் இல்லாத பட்சத்தில், அதைத் தேடி அலையாமல் சாதாரண நீரையே ஊற்றலாம்.

* எந்த அளவுக்கு வேகமாகச் செயல்படுகிறோமோ அந்த அளவுக்கு அதன் வீரியத்தைத் தவிர்க்கலாம். கிட்டதட்ட 90 சதவிகிதத்துக்கு மேல் அதன் விளைவைக் குறைக்கலாம்.

* அமிலம் தவறி கண்களில் பட்டுவிட்டாலும், உடனடியாகக் கண்ணிலும் தண்ணீர் ஊற்றலாம். பிறகு, கண் மருத்துவரிடம் சென்று வைத்துப் பரிசோதித்துக் கொள்ளலாம்.

* அமிலம் வாயில் சென்றாலும், மூச்சுக் குழாய்ப் பாதிக்கப்பட்டாலும் அதற்கான மருத்துவரை அணுக வேண்டும்.

* அதேபோல், துணிகள் மீது ஆசிட் பட்டிருந்தால் உடனே அந்தத் துணியை மாற்றிவிடுவது அவசியம்.

* அமிலம் தாக்கப்பட்ட நபரை மருத்துவமனைக்கு வருவதற்குள் அது அவர்களின் தோலை சேதமாக்கிவிடுகிறது. எனவே, சுற்றியிருப்பவர்கள் திறம்படச் செயல்பட்டால் ஆசிட் வீச்சால் ஏற்படும் பாதிப்பு குறையும்" என்றார்.

ஆசிட் வீச்சைத் தடுக்க வேண்டி போராடி வரும் சமூகச் சேவகி சுவர்ணலதா, "ஆசிட் வீச்சினால் பாதிக்கப்பட்டவரையும், அதை விற்பவரையும் அடுத்த நாளே தண்டிக்க வேண்டும். அவர்களுக்குச் சட்டம் என்கிற பெயரில் மிகக் குறைந்தபட்ச தண்டனையே தருகிறார்கள். தண்டனைக் அதிகரித்தால்தான் தவறுகள் குறையும். ஆனால், இங்குப் பாதிக்கப்பட்ட குடும்பம்தான் பெரிதாகத் தண்டனை அனுபவிக்கிறது. விநோதினியின் அம்மாகூடத் தற்கொலைச் செய்துகொண்டார். இதைத் தடுக்க ஒரே வழிதான் இருக்கிறது.

பெண்களின் முக்கியத்துவத்தையும், அவர்களை வதைக்கக்கூடாது என்பதையும் பள்ளியில் இருந்தே கற்று தர வேண்டும். சிறு வயதிலிருந்தே இதைச் சொல்லி வளர்த்தால் ஆசிட் வீச்சு போன்ற வன்முறை குறையும். ஒவ்வொரு பெண்ணும் நம் சகோதரி, தாய் போன்றவள் என்று நம் வீட்டுக் குழந்தைகளிடம் முதலில் புரிய வைத்தாலே போதும். பெண்களின் மீதான வன்மத்தை வேரோடு அறுத்துவிடலாம்" என்கிறார்.

- கு.அஸ்வின்

வெற்றிக்குப் பல வழிகள்!

இன்றைக்கு மிகக் குறைந்த சம்பளம் தரக்கூடிய சாதாரண வேலையில் சேருவதற்குக்கூட குறைந்தபட்ச கல்வித் தகுதி வேண்டியிருக்கின்றது. ஆனால், நாமே சொந்தமாக ஒரு தொழிலைத் தொடங்குவதாக இருந்தால், எந்தக் கல்வித் தகுதியும் தேவையில்லை அல்லவா?. அப்படியிருந்தும் வெகு சிலரே பிசினஸில் ஜெயித்துக்கொண்டி ருப்பதைப் பார்க்கிறோம். ஆக, பிசினஸ் என்பது எல்லோருக்கும் வெற்றி யைத்தரும் களம் அல்ல. பிசினஸ் செய் வதற்கான குணங்களையும், வெற்றி பெற்றேயாகவேண்டும் என்ற தீராத தாகத்தையும் கொண்டவர்களால் மட்டுமே பிசினஸில் வெற்றிபெற முடிகின்றது.

என்ன வேண்டும்?

தனது நாற்பது வயதிற்குள்ளாக, தான் கற்றுக்கொண்ட வாழ்க்கைப் பாடங்களை, நமக்கு ஒன்பது பாகங்களாக இந்தப் புத்தகத்தில் தந்திருக்கிறார் ஆசிரியர் கிரண் பட். முதல் தலைமுறை தொழிலதிபரான கிரண் பட், தனது நண்பரான சேகர் சேஷனின் உதவியுடன், பல பிசினஸ் பிரபலங் களின் அனுபவங்களையும், அவர்கள் வெற்றி பெற்றதற்கான காரணிகளையும் தொகுத்து அளித்துள்ளார். மேலும், ஒவ்வொருவரும் பிசினஸில் வெற்றிபெற முடியுமென்றும், அதற்கான சிறப்பு தகுதிகளோ அல்லது பரம்பரை தொழிலோ தேவையில்லை என்றும் கூறுகின்றனர் ஆசிரியர்கள். மனவலிமை, வெற்றிக்கான வெறி, தொடர்ந்து புதியவற்றைக் கற்றுக்கொள்ளும் திறன் மற்றும் தோல்விகளிலிருந்து விரைவில் மீண்டுவரும் குணம்; இவையே ஒருவரின் பிசினஸ் வெற்றியை தீர்மானிக்கின்றன என்றும் தெளிவுபடுத்துகிறார்கள்.

செய்வதை விரும்பிச் செய்!

சைக்கிள் பெடலை தொடர்ந்து மிதித்துக் கொண்டிருக்கும்வரை, கீழே விழ வாய்ப்பில்லை, அதுபோல ஒரு தொழிலை விரும்பிச் செய்துகொண் டிருக்கும்வரை அதில் தோல்வியடையும் வாய்ப்புக் குறைவு. விருப்பமே இல்லாமல் ஒரு தொழிலைச் செய்யும் போது அதில் வெற்றி (சக்சஸ்) மட்டு மல்ல சும்மா வெறுமனே (சர்வைவ்) கூட தொடர்ந்து இருக்க முடியாது என்கிறார்கள் ஆசிரியர்கள்.

விரும்பிச் செய்யும் செயல்களில் ஏற்படும் சறுக்கல்களைக்கூட நம்மால் எளிதில் சமாளித்துவிட முடியும், அதேசமயம் செய்யும் செயலில் விருப்பம் இல்லையென்றால், அதில் ஏற்படும் சின்ன சின்ன தோல்விகளைக்கூட நம்மால் சமாளிக்கவோ, அதிலிருந்து மீண்டு வரவோ முடியவே முடியாது என்கிறார்கள் ஆசிரியர்கள்.

தனது நாற்பத்திமூன்றாம் வயதில் ஆச்சி மசாலா நிறுவனத்தைத் தொடங்கிய பத்மசிங் ஐசக், இன்றும் தன் மார்க்கெட்டிங் டீமிற்கு தானே தலைமை யேற்று நடத்திவருகிறார். மேலும், மார்க்கெட்டிங் டீமிலுள்ள ஒவ்வொரு வரையும் தனிப்பட்ட முறையில் தெரிந்து வைத்திருக்கிறார். இதற்கு இவர் சொல்லும் காரணம், “ஒரு தயாரிப்பாளரை விட சிறப்பாக மற்றவர் களால் ஒரு பொருளை பிரபலம் செய்து விடமுடியாது” என்பதே. தானே தனிப்பட்ட முறையில் தகவல்களைத் தெரிந்துகொள்வதில் அதிக விருப்பமும், ஆர்வமும் உள்ளவர் ஐசக்.

தினமும் காலையில் வாக்கிங் செல்லும் போது குறைந்தது பத்து குப்பைத் தொட்டிகளையாவது நோட்டம் விடுகிறார். அருகில் வசிக்கும் மக்களின் விருப்பமான மசாலா எது என்பதை, அதில் உள்ள காலி பாக்கெட்டுகளின் மூலம் அறிந்துகொள்கிறார் ஐசக். அதில் அதிகளவு ஆச்சி மசாலா பாக்கெட் இருந்தால் மகிழ்ச்சியடையும் ஐசக், அதேசமயம் மற்ற பிராண்டு களைக் காணும்போது அதைக் குறித்து வைத்துக்கொள்வதற்கும் தவறுவ தில்லை. அன்றே, தனது ரிசர்ச் டீமின் மூலம் அந்த மசாலா பாக்கெட்டுகளை வாங்கி, ஆராய்ந்து அதில் மக்களுக்கு பிடித்த அம்சம் என்னவென்று அறிந்துகொண்டு, அதன்மூலம் தனது தயாரிப்புகளை மேம்படுத்துகிறார். இதற்கெல்லாம் காரணம் பிசினஸில் அவருக்கு இருக்கும் அபரிமிதமான விருப்பமும், ஈடுபாடும் தானே!.

வாடிக்கையாளரைக் கவனியுங்கள்!

சாம்ராட் என்ற புகழ்பெற்ற சைவ உண வகம் ஒன்று மும்பையில் உள்ளது. இங்குள்ள வாஷ்ரூமில் கூட டெலிவிஷன் உள்ளதைக் காணமுடிகிறது. இதற்கு காரணம் என்ன? இந்த உணவகம் மும்பை பங்குச்சந்தை உள்ள பிரபலமான தலால் ஸ்ட்ரீட் அருகில்தான் செயல்படுகின்றது. சாப்பிட வரும் வாடிக்கையாளார்களில் பெரும்பாலானோர் பங்குச்சந்தையில் வர்த்தகம் செய்பவர்களே! இவர் களைக் கவர்வதற்காகவே இந்த டெலி விஷன் ஏற்பாடு. வாஷ்ரூமை உபயோகிக் கும்போது கூட ஸ்டாக் மார்க்கெட்டின் நிலவரங்களை தனது வாடிக்கை யாளர்கள் தவற விட்டுவிடக்கூடாது என்று உணவக நிர்வாகம் சிந்தித்ததன் விளைவே இது. இந்த ஏற்பாடு பெரு மளவில் உணவகத்தின் மதிப்பை உயர்த்துவதோடு மட்டு மல்லாமல் தொடர்ந்து தங்களின் வாடிக்கையாளர்களைத் தக்கவைத்துக் கொள்வதற்கான செயல்பாடு என்கின்றனர் நூலாசிரியர். வாடிக்கை யாளர்களைக் கவராத எந்தவொரு தொழிலும் வெற்றி பெற்றதாக சரித்திரம் இல்லை அல்லவா!

மாற்றம் ஒன்றே மாறாதது!

ஒரு தொழிலை ஆரம்பித்து நடத்திக்கொண்டி ருக்கிறோம், ஒரே மாதிரியான தயாரிப்பு களையோ அல்லது சேவைகளையோ எவ்வளவு நாளைக்குத்தான் வாடிக் கையாளர்களுக்குக் கொடுத்துக் கொண்டிருப்பது? இதில் ஏதேனும் மாற்றம் செய்யவேண்டாமா? கண்டிப் பாக புதிய மாற்றங்களை, குறிப்பிட்ட கால இடைவெளியில் கொண்டுவந்தேயாக வேண்டும் என்கின்றனர் நூலாசிரியர்கள். புதியவற்றை தொழிலில் புகுத்தாதவரை, பெருமளவில் சம்பாதிக்கவோ அல்லது இருக்கின்ற மார்க்கெட்டை தக்கவைத்துக் கொள்ளவோ முடியாது என்பதே ஆசிரியர்களின் கருத்து.

உடுப்பி ஹோட்டல் பற்றி அனை வரும் கேள்விபட்டிருப்போம், ஆரம்ப காலத்தில் இங்கு பாரம்பரிய உணவுகளான இட்லி, தோசை போன்ற வற்றை மட்டுமே கொடுத்துக்கொண்டிருந் தார்கள். பின்பு படிப்படியாக பஞ்சாபி உணவு வகைகளையும் தங்களது மெனுவில் சேர்த்து கஸ்டமர்களுக்கு கொடுக்கத் துவங்கினர். இன்று, இவர் களின் மெனு கார்டை பார்த்தோமானால், சைனீஸ், மெக்சிகன் மற்றும் குஜராத்தி உணவு வகைகளையும் காண முடிகிறது. இவர்களை இவ்வாறு மாறத் தூண்டியதற்கான காரணம் என்ன? வாடிக் கையாளர்களின் தேவைகளின் மீதான இவர்களின் கணிப்பே இதற்கு காரணம். குடும்பமாக வரும் வாடிக்கையாளர் களில், ஒவ்வொருவருக்கும் ஒவ்வொரு விதமான விருப்பம் இருப்பதைக் காண் கிறார்கள், அனைவரின் விருப்பத்தை யும் நிறைவேற்றவும், அதேசமயம் உடுப்பி ஹோட்டல் போன்ற ஹோட்டல் களை விரும்பும் மிடில்கிளாஸ் வாடிக்கை யாளர்களை தக்கவைத்துக்கொள்வ தற்குமே இந்த மாற்றங்களைத் தொடர்ந்து செய்துகொண்டிருக்கிறார்கள்.

கற்றுக்கொண்டே இருங்கள்!

தொடர்ந்து தினமும் புதியவற்றைக் கற்றுக்கொண்டேயிருப்பது, பிசினஸில் வெற்றிபெறுவதற்கான முக்கிய அம்சமாக பார்க்கப்படுகிறது. போட்டி கள் நிறைந்த இன்றைய வர்த்தக சூழ்நிலை யானது முழுக்க முழுக்க தொடர்ச்சி யான கற்றலைப்பொறுத்தே அமைந்தி ருக்கிறது.

இன்போசிஸ் நிறுவனர் நாராயண மூர்த்தியின் கூற்றானது; “இன்போசிஸில் நான் செய்ய நினைக்கும் ஒவ்வொரு மாற்றத்திற்கு முன்னாலும் நான் என்னை மாற்றிக்கொள்வேன்” என்பதாகும். அதாவது, நமது நிறுவனம் அடுத்தக் கட்டத்திற்கு செல்லத் தயாராவதற்கு முன், நாம் முதலில் அந்த நிலைக்கு நம்மை மாற்றிக்கொள்ள வேண்டும். ஒரு வகுப்பிற்குள் ஆசிரியர் வரு வதற்கு முன், மாணவர்கள் தயாராக இருப்பதைப்போல, எதிர்வரும் மாற்றத்திற்கு தகுந்தாற்போல் நம்மை முதலில் தயார்படுத்திக்கொள்ள வேண்டும். இதற்கு தொடர்ச்சியான கற்றலே ஒரே வழி என்பதே ஆசிரியர் களின் வாதமாக இருக்கின்றது.

நம்மைச்சுற்றி ஒவ்வொரு நிமிடமும் நிகழும் மாற்றங்களுக்கேற்ப நம்மை தயார்படுத்திக்கொள்ள, தினமும் புதியவற்றை கற்றுக்கொண்டே இருப் பது மிகவும் அவசியமாகிறது. இதுவே எதிர்வரும் மாற்றங்களோடு சேர்ந்து நம்மையும், நமது நிறுவனத் தையும் அடுத்த நிலைக்கு வெற்றி கரமாக அழைத்துச்செல்கிறது. கற்றுக் கொள்வதற்கான வாய்ப்புகள் அனுதினமும் நம்மைச்சுற்றி இருந்துக் கொண்டேதான் இருக்கிறது. அவற்றை நாம் உள்வாங்கி, செயல்பட ஆரம்பிக்கும்போது நாமும் வெற்றிக ரமான தொழிலதிபராக வலம்வர முடியும்.

p.krishnakumar@jsb.ac.in

தொழிலதிபராக என்ன தேவை?

புத்திசாலித்தனம், கடின உழைப்பு, நல்ல படிப்பு, தொழில் அனுபவம் இருந்தால் மட்டுமே ஒரு வெற்றிகரமான தொழில் அதிபராக ஆகி விட முடியுமா? இல்லை, அது மட்டும் போதாது. கடந்த பல ஆண்டுகளாக எனக்கு தெரிந்த பலர் மிக பெரிய கனவுகளோடு தங்கள் சுய தொழிலை ஆரம்பித்தார்கள். ஆனால் ஒரு குறுகிய காலத்திற்கு உள்ளாகவே தாக்கு பிடிக்க முடியாமல் கடையை மூடிவிட்டனர். இவர்களிடம் புத்திசாலித்தனத்திற்கோ, கடின உழைப்பிற்கோ பஞ்சமே இல்லை சொல்ல போனால் ஒரு சிலர் MBA கூட படித்திருந்தார்கள்.

அப்படியென்றால் ஒரு நிறுவனத்தில் வேலை செய்யும் போது ஒரு வெற்றி யாளராகவும், தங்கள் கார்ப்பரேட் பயணத்தில் ஒரு அதி வேக வளர்ச்சியை அடைந்தபோதிலும் தங்களுடைய சொந்த தொழில் என்ற போது அதே மாதிரியான வெற்றியை அடைய முடியவில்லை என்றால் அதற்கு காரணம் என்னவாக இருக்கும்? சற்று சிந்திக்க வேண்டும்!

இதை நான் ஆராய்ந்த போது மிகத் தெளிவாக தெரிந்து கொண்டது ஒன்றுதான். ஒரு தொழிலாளியாகச் செயல்படும் போது இருக்க வேண்டிய சிந்தனையும், மனப்பாங்கும் வேறு, ஒரு முதலாளியாக, தொழில் அதிபராக செயல்படும் போது இருக்க வேண்டிய சிந்தனையும், மனப்பாங்கும் வேறு. நான் ஒரு தொழில் நிறுவனராக கற்று கொண்ட மிக பெரிய பாடம் என்னவென்றால் "எது நடந்தாலும் அதற்கு நான்தான் பொறுப்பு - நான் மட்டுமே தான் பொறுப்பு" என்பதுதான்.

என்னுடைய வெற்றி-தோல்வி, இரண்டிற்குமே காரணம் நானாகதான் இருக்க முடியும் என்ற மனப்பக்குவம் அவசியம். நாம் பள்ளியிலோ (அ) கல்லூரியிலோ படிக்கும் போதும் சரி (அ) எங்கேயோ வேலைக்கு செல்லும் போதும் சரி நம்மிடம் கொடுக்கப்பட்ட ஒரு பணி சரிவர முடியவில்லை என்றால் அதற்கு ஆயிரம் காரணங்களைக் கூறுவதோடு, இவர் அதனைச் சரியாக செய்யவில்லை, அவர் அதனை சரியான நேரத்தில் எனக்கு கொடுக்கவில்லை அதனால்தான் என்னால் கொடுத்த பணியை சரியாக செய்ய முடியவில்லை என்று அடுத்தவர் மீது பழியை போடுவதையே ஒரு வழக்கமாக பெரும்பாலானோர் கொண்டுள்ளனர்.

இத்தகைய ஒரு சிந்தனையோடு செயல்படும் ஒருவரால் ஒரு வெற்றிகரமான தொழில் அதிபராக உருவெடுக்கவே முடியாது என்பது என்னுடைய ஆழமான நம்பிக்கை. இப்படி நம் சிந்தனைதான் நம் வாழ்க்கையையே வழி நடத்திச் செல்கிறது. டாக்டர் பட்டம் பெற்றவர் கூட சொந்த தொழிலில் தோல்வியை மிக விரைவாக தழுவுவதற்கு காரணமாக அமைந்து விடுகிறது.

இதனால் நான் படிப்பு தேவையில்லை என்றோ, அது உபயோகப்படாது என்றோ எண்ணிவிட வேண்டாம். இன்றைய போட்டி நிறைந்த ஒரு உலகத்தில் படிப்பும், திறமையும் மிகவும் முக்கியம் என்பதில் ஐயமில்லை. ஆனால் அதை விட மைன்ட்செட் என்பது தான் ஒரு தொழில் அதிபரின் வெற்றியையும், தோல்வியும் தீர்மானிப்பது என்பது நிச்சயம்.

- கே.சுவாமிநாதன் 

aspireswaminathan@gmail.com