தனித்துவமே வெற்றிக்கு வழி

விற்கும் பொருள் பிராண்டாவது அது மற்ற பிராண்டுகளிலிருந்து வித்தியாசப்படுத்திக் காட்டும் போதுதான். அப்படி வித்தியாசப்படுத்தி காட்டத்தான் மார்க்கெட்டர். தனியாய், தனித்துவமாய் தெரிந்தால் மட்டுமே வாடிக்கையாளர் வாங்குவார். வித்தியாசப்படுத்திக் காட்டாத பிராண்டுகள் வழக்கொழிந்து போகும் என்று ’Differentiate or die’ என்ற புத்தகத்தில் கூறுகிறார்கள் ‘ஜாக் ட்ரவுட்’ மற்றும் ‘ஸ்டீவ் ரிவ்கின்.

பெரிய நிர்வாகங்கள் முதல் சின்ன சைஸ் பிசினஸ்மென் வரை பலர் தங்கள் பிராண்டுகளை வித்தியாசப்படுத்திக் காட்டவேண்டும் என்ற சிந்தனையே இல்லாமல் பிசினஸ் செய்கிறார்கள். தனியாய் தெரியாத பிராண்டை தரணியெங்கும் தெரிய வைக்க பணத்தை தண்ணியாய் செலவழிக்கின்றனர். தனித்துவமாய் தெரியாத பிராண்டை பிரமோட் செய்ய தகிடுதத்தம் போடுகின்றனர்.

இத்தனை மெனக்கெடுபவர்கள் தங்கள் பிராண்டை வித்தியாசப்படுத் துவதில் மெனக்கெட்டால் இத்தனை செலவழிக்கவே வேண்டாம். வெற்றி வாய்ப்பையும் பெருக்கலாம்.

’புதுக் கடை ஆரம்பித்து வெற்றி பெறத் தேவையான மூன்று விஷயங்கள் இடம், இடம், இடம் என்பார்கள். பிராண்ட் வெற்றிப் பெற தேவையான மூன்று விஷயங்கள் வித்தியாசம், வித்தியாசம், வித்தியாசம்’ என்றார் கோகோ கோலா கம்பெனியின் முன்னால் சிஇஓ ’ராபர்தோ கொய்ஸுத்தா’. பிராண்டை வித்தியாசப்படுத்த பல வழிகள் உண்டு. அவைகளில் சிலதை மட்டும் உதாரணங்களோடு பார்ப்போம்.

முதல் பிராண்டாய் நுழைவது

பிராண்டை வித்தியாசப்படுத்தி காட்ட மிகவும் ஈசியான, ராசியான, ஓசியான வழி பொருள் பிரிவில் முதல் பிராண்டாய் நுழைவது. வாழ்க்கை முதல் வியாபாரம் வரை மனதில் முதலில் புகுவது பளிச்சென்று பதிகிறது.

பல க்ரீம்கள் இருக்க, சிவப்பழகு தருகிறேன் என்று வித்தியாசப்படுத்தி மனதில் முதலில் நுழைந்தது ‘ஃபேர் அண்டு லவ்லி’. உபயோகித்தவர்கள் சிவப்பானார்களா தெரியாது, ஃபேர் அண்ட் லவ்லி சிவப்பாய், அழகாய் வெற்றி பெற்றது தெரியும்.

’ஒரு தரம் முடிவு பண்ணா என் பேச்ச நானே கேக்கமாட்டேன்’ என்பது பஞ்ச் டைலாக் மட்டுமல்ல, பஞ்சமில்லாத உண்மையும் கூட! முடிவு செய்த எந்த மனமும் லேசில் மாறுவதில்லை. மாற்ற மன்றாட வேண்டும். பொருள் பிரிவில் முதலாவதாய் நுழையும் பிராண்டை வாடிக்கையாளர் மனம் சட்டென்று ஏற்கிறது. பின்னால் வரும் பிராண்டுகளை அத்தனை எளிதாக ஏற்பதில்லை.

விசேஷ குணங்களை உள்ளடக்குவது

பிராண்டிற்கென்று விசேஷ குணங்கள் (Attributes) உருவாக்கி அதன் மூலம் பிராண்டை வித்தியாப்படுத்திக் காட்டலாம். எத்தனையோ டூத்பேஸ்ட்கள் இருக்க ‘க்ளோஸ் அப்’ தன்னை வித்தியாசப்படுத்த ‘ஜெல் வடிவில் புத்துணர்ச்சி அளிக்கிறேன்’ என்றது. இன்று ஜெல் பிரிவில் ஜில்லென்று உட்கார்ந்து சல்லென்று ஆட்சி செய்கிறது.

பிராண்ட் ஒரு விசேஷ குணத்தை ஸ்வீகரித்து கொண்டு விட்டால் அதை போட்டி பிராண்ட் அபகரிக்க முடியாது. ஜெல் வடிவில் ‘கோல்கேட் மாக்ஸி ஃப்ரெஷ்’ வந்து ‘புத்துணர்ச்சி அளிக்கிறேன்’ என்று தம்பட்டம் அடித்தது. ஏற்கெனவே க்ளோஸ் அப் கல்லா கட்டி வரும் குணத்தை பிடுங்க நினைத்துதான் அடித்த தம்பட்டம் பெரிய தப்பாட்டம் என்பதை உணர்வதற்குள் மேக்ஸி ப்ரெஷ் மேக்சிமம் ஃபெயிலியர் ஆனது!

பொருள் பிரிவில் முதலிடத்தில் இருப்பது

பொதுவாகவே தலைவர் எவ்வழியோ தொண்டர் அவ்வழி. நம்பர் ஒன் பிராண்ட் சொன்னால் அது கரெக்ட் தான் என்று வாடிக்கையாளர்கள் நம்புகிறார்கள். பெரிய பிராண்டுகளுக்கு மட்டுமே கிடைத்த பேறு இது. சாக்லேட் மார்க்கெட்டில் ‘கேட்பரீஸ்’ சொல்வதே வேத வாக்கு. நூடுல்ஸ் பிரிவில் ‘மேகி’ இட்டதே சட்டம். பெரியதென்றால் அதுவே சரியானது, ஏற்கத்தக்கது என்று மக்கள் காலகாலமாக நம்ப பழகிவிட்டனர். ஜெயிக்கற கட்சிக்கு ஓட்டு போடும் வர்க்கம் ஆயிற்றே நாம்! அதற்காக நம்பர் ஒன் பிராண்ட் பீற்றிக்கொள்ளவேண்டும் என்று அவசியமில்லை. தங்கள் லீடர்ஷிப்பை மூன்று வகையில் நாசூக்காய் கூறலாம். உலகிலேயே அதிக விற்பனையாகும் பொடுகு நீக்கும் ஷாம்பு என்று கூறும் ‘ஹெட் அண்ட் ஷோல்டர்ஸ்’ போல. இதற்கு ’சேல்ஸ் லீடர்ஷிப்’ என்று பெயர். அதிசிறந்த தொழிற்நுட்பம் கொண்ட பிராண்ட் என்று கூறலாம், ‘இண்டெல்’ போல. இது ’டெக்னாலஜி லீடர்ஷிப்’. சிறந்த செயல்திறன் பற்றி பேசலாம், ‘ஜில்லெட்’ போல. இது ’பெர்ஃபார்மன்ஸ் லீடர்ஷிப்’.

பாரம்பரியத்தை பறைசாற்றுவது

’வயசானவங்களுக்கு மரியாதை கொடு’ என்று கூறக் கேட்டே வளர்ந்து விட்டோம். மரியாதை கொடுக்கிறோமா என்பதை விடுங்கள். பாரம்பரியத்துக்கென்று ஒரு பதவிசு இருக்கவே செய்கிறது. மார்க்கெட்டிங்கிலும் இது உண்டு. ’110 வருடங்களாக மக்கள் சேவையில்’ என்று ‘சிட்டி யூனியன் பாங்க்’ தன்னை பற்றி வித்தியாசப்படுத்தும்போது ‘இத்தனை காலம் இருந்திருந்தால் நல்ல பாங்க்காகத் தான் இருக்கும், தைரியமாக பணம் போடலாம் என்று தோன்றுகிறதில்லையா? அதே போல் ‘தலைமுறை தலைமுறையாக வரும் சிமெண்ட்’ என்று ‘சங்கர் சிமெண்ட்’ சொல்வதும் வெற்றிகரமாக தன்னை வித்தியாசப்படுத்தத் தானே!

ஸ்பெஷலிஸ்டாய் திகழ்வது

கண்ணுக்கு ஒரு டாக்டர். காதிற்கு வேறொருவர். சருமத்திற்கு மூன்றாமவர் என்று முகத்தில் இருக்கும் மூன்று பார்ட்டுகளுக்கே மூன்று வெவ்வேறு டாக்டர்கள் தேவைப்படும் ஸ்பெஷலிஸ்ட்களை எதிர்ப்பார்க்கும் காலம் இது. வாங்கும் பிராண்டும் ஸ்பெஷலிஸ்டா என்று தேடிப் பார்த்தே நாம் வாங்குகிறோம். காபிக்கு ‘ஆவின்’ பால் என்றால் தயிர் செய்ய ‘ஆரோக்கியா’ பால் தேவைப்படுகிறது. நாலறை சதவீதம் திக்கான பால் என்று ஆரோக்கியா தன்னை வித்தியாசப்படுத்தியிருப்பதால்.

தயாரிக்கும் விதத்தில் வித்தியாசப்படுவது

தயாரிக்கும் விதம் கொண்டு பிராண்டை வித்தியாசப்படுத்த முடியும். ’சுத்தமான நெய்யினால் செய்யப்பட்டதல்ல’ என்றே பார்த்து பழக்கப்பட்ட ஸ்வீட் கடைகளிலிருந்து தன்னை வித்தியாசப்படுத்திக் காட்ட ‘சுத்தமான நெய்யினால் மட்டுமே செய்யப்பட்டது’ என்று ஷார்ட்டாய் கூறி ஸ்வீட்டாய் வெற்றி பெற்ற ‘ஸ்ரீ கிருஷ்ணா ஸ்வீட்ஸ்’ போல!

உட்பொருள் மூலமும் வித்தியாசப்படுத்த முடியும். ‘ஃபேர் அண்ட் லவ்லி’ முதலில் நுழைந்து வெற்றி பெற்ற க்ரீம் என்று பார்த்தோம். அதன் பின் வந்த ‘ஃபேர்எவர்’ சிவப்பழகு தர எங்களிடம் பால் மற்றும் குங்குமப் பூவின் நற்குணங்கள் இருக்கிறது என்று வித்தியாசப்படுத்திக் காட்டியது. வில்லங்கமில்லாமல் வெற்றி பெற்றது!

இந்த முறைகள் எதுவும் என் பிராண்டிற்கு பொருந்தாதே என்கிறீர்களா? இவை உங்கள் பிராண்டிற்கு பொருந்த வைக்க அல்ல. வித்தியாசப்படுத்த எத்தனையோ வழிகள் உண்டு என்று உங்களை திருந்த வைக்க. இது போல் புதியதாய் சிந்தித்து பிராண்டை வித்தியாசப்படுத்துங்கள் என்று உங்களுக்கு புரிய வைக்க. அவ்வளவே.

வித்தியாசப்படுத்துவது எப்படி என்று பார்த்த நாம் எப்படி வித்தியாசப்படுத்தக்கூடாது என்று பார்ப்பதும் பயன் தரும். அதோடு இந்த வித்தியாசத்தை யார் உருவாக்குவது என்ற உண்மையை உணர்வதும் உபயோகமாக இருக்கும். இடமின்மை காரணமாக இதை அடுத்த வாரம் பார்ப்போம். என்னடா, இது மெகா சீரியல் போல நீள்கிறதே என்று அலுத்துக்கொள்ளாதீர்கள். அடுத்த வாரம் கண்டிப்பாய் இந்த டாபிக் முடியும்.

satheeshkrishnamurthy@gmail.com

வாட்ஸ் அப்புக்கு வழிவிடும் ஃபேஸ்புக்

கையில் எப்போதும் மொபைல வச்சுக்கிட்டு என்னதான் பண்றாங்கன்னே தெரியல எனச் சலித்துக்கொள்கிறீர்களா? உங்கள் நிலைமை ரொம்ப கஷ்டம்தான். ஏனெனில் இளைஞர்கள் தங்கள் கையகலக் கருவியில் உலகத்தைப் பார்க்கிறார்கள். உலகெங்கிலும் வாழும் தங்கள் நட்பையும் உறவையும் வாட்ஸ் அப் வழியே ஒன்றிணைத்துக் குதூகலிக்கிறார்கள்.

அமிஞ்சிக் கரையில் தான் பார்க்கும் அழகான காட்சி ஒன்றை அமெரிக்காவில் உள்ள நண்பனுக்கு உடனே வீடியோ படமாக எடுத்து அனுப்பிவிட முடிகிறது. சில நிமிடங்களுக்குள் அந்தப் படம் கண்டம்விட்டு கண்டம் பாய்ந்துவிடுகிறது. குதூகலத்தின் திரியில் வைக்கப்படும் நெருப்பு உலகைச் சில நிமிடங்களில் உற்சாகத்தில் மூழ்கடித்துவிடுகிறது.

ஸ்மார்ட் போனின் அப்ளிகேஷனான வாட்ஸ் அப் என்னும் மந்திரம் இளைஞர்களுக்கு ஜீபூம்பா காட்டுகிறது. அவர்கள் ஏவும் வேலையை எல்லாம் செய்துவிட்டு அடுத்து என்ன என்பது போல் அந்தப் பூதம் காத்துக் கிடக்கும். ஸ்மார்ட் போனில் உள்ள நண்பர்கள் யார் யாரெல்லாம் வாட்ஸ் அப் வைத்திருக்கிறார்கள் என்பதை உடனுக்குடன் காட்டிக் கொடுத்துவிடுகிறது. அவர்கள் எப்போது வாட்ஸ் அப்பில் மெஸேஜைப் பார்த்தார்கள் என்னும் தகவல் நகர்ந்துகொண்டே இருக்கிறதே. ஐ லவ் யூ சொல்லக் கடிதம் எழுதி அதை அவள் படித்தாளோ, இல்லையோ என இளைஞர்கள் கவலை கொள்ள வேண்டியதில்லை.

வாட்ஸ் அப்பில் நினைத்ததைச் சொல்லி வீடியோ ஃபைலாக அனுப்பிவிடலாம். அவள் பதிலுக்கு ஓகே சொல்லலாம். அல்லது செருப்பைக்கூடக் காட்டலாம். அதைப் பற்றி என்ன, ஷேம்லெஸ் கய்யாக மாறி அடுத்த தொடர்புக்குத் தாவிவிடலாம்.

வாட்ஸ் அப்பை அணுக கம்ப்யூட்டர் தேவையில்லை ஸ்மார்ட் போனே போதும் என்னும் நிலையின் காரணமாக, அது ஃபேஸ்புக்கைவிட எளிதில் இளைஞர் உலகத்தில் ஊடுருவிவிட்டது. இளைஞர்கள் என்றில்லை, கிட்டத்தட்ட ஸ்மார்ட் போன் வைத்திருக்கும் அனைவரிடம் வந்து சேர்ந்துள்ளது இந்த வாட்ஸ் அப். என்ன உனக்கு எழுதப் படிக்கத் தெரியாதா என்று கேள்வி கேட்பதுபோல வாட்ஸ் அப் உன்னிடம் இல்லையா என எள்ளலுடன் கேட்கிறார்கள்.

வேறு வழியின்றி பலர் அதில் தங்களை இணைத்துக்கொள்ள நேர்கிறது. இந்தியாவில் சுமார் ஏழு கோடிக்கும் மேற்பட்டோர் வாட்ஸ் அப்பைப் பயன்படுத்துகிறார்கள். ஃபேஸ்புக் போஸ்ட்களில் பரவுவதைப் போல இதிலும் கேளிக்கைச் செய்திகள் நிமிடங்களில் பரவுகின்றன.

குடும்ப உறுப்பினர்கள், அலுவலக நண்பர்கள், பள்ளி நண்பர்கள், கல்லூரித் தோழர்கள் எனப் பல குழுக்களில் இணைந்துகொண்டு வாழ்க்கையைச் சுவாரசியப் படுத்திக்கொள்கிறார்கள். வேலைகளின் நடுவே கிடைக்கும் நேரத்தில் இளைப்பாற வாட்ஸ் அப் நன்கு கைகொடுக்கிறது. எங்கேயோ இருக்கும் நண்பன் அனுப்பும் ஒரு ஸ்மைலி துக்கங்களைத் தூசாக்கித் துடைத்துச் செல்கிறது.

இதிலும் வளவளவெனக் குப்பைகளைக் கொட்டும் நண்பர்கள் இருக்கத்தான் செய்கிறார்கள். இஷ்டம்னா படிக்க வேண்டியது தான், இல்லாட்டி விட்டுற வேண்டியதுதான். என்ன செய்றது பாஸ், நண்பர்கள்னா தொந்தரவும் இருக்கத்தானே செய்யும் என்று இயல்பாக எடுத்துக்கொள்கிறார்கள்.

மெயில், ஆர்குட், ஃபேஸ்புக் என்று கணினியை மையப்படுத்திய தொழில்நுட்ப வளர்ச்சியில் வாட்ஸ் அப், டெலிகிராம் போன்றவை கைபேசியை மையப்படுத்துவதால் எளிதில் அனைவரையும் ஈர்த்துவிடுகின்றன. இனி ஃபேஸ்புக், வாட்ஸ் அப்புக்கு வழிவிட்டு நிற்பதைத் தவிர வேறு வழியே இல்லையோ?

ரிஷி

தொழில் செய்ய ஆசை இருக்குதா?

‘‘யாருக்கோ வேலை செஞ்சது போதும். நானா தனியா ஏதாவது பண்ணலாம்னு பாக்கறேன். நல்ல பிஸினஸ் பிளான் இருந்தால் சொல்லுங்களேன்! என்று வந்து அமர்ந்தார் நண்பர்.

நல்ல பொண்ணு இருந்தா சொல்லுங்க. லவ் பண்ணனும்னு கேக்கற மாதிரி இருக்கு. உங்களுக்குத் தேவை இருந்தா இந்நேரம் ஆரம்பிச்சிருப்பீங்க. ஐடியா எல்லாம் கேக்கமாட்டீங்க! என்று உரிமையாய்ச் சொன்னேன்.

பெட்டிக்கடைத் தகுதி

வேலையில் சலிப்பு வரும் போது பலர் சொந்தமாகத் தொழில் செய்வதைப் பற்றி பேசுவர். “இந்த வேலை செய்யறதுக்கு பெட்டி கடை வைத்துப் பிழைத்துக் கொள்ளலாம்” என்பர். மகன் படிக்கவில்லை என்றால் “நீ ஆடு மாடு மேய்க்கத் தான் லாயக்கு” என்று சொல்வது போல. நிஜத்தில் பெட்டிக்கடை வைத்திருப்பதற்கும் மாட்டைப் பராமரிப்பதற்கும் சிறப்புத் தகுதிகள் தேவைப்படுகின்றன.

சின்னப் பெட்டி கடை வைத்திருப்பவர் ஒரு நாள் 14 மணி நேரம் ஒரே இடத்தில் உட்கார்ந்து வேலை செய்யணும். வெயில், மழை பாராது கடையைத் திறந்து வைக்கணும். பந்த் என்றால் கூட ஆறு மணிக்கு மேல் கடை திறக்கக் காத்திருக்கணும். விடுமுறை நாளெல்லாம் கிடையாது. உணவு இடைவேளைக்குக் கூடக் கடை மூட முடியாது. மூலையில் சாப்பிட உட்காருகையில் வாடிக்கையாளர் வந்தால் பொருள் தர எழுந்திருக்கணும். எல்லா வகை மனிதர்களையும் சமாளிக்கணும். போட்ட முதலை ஒவ்வொரு ரூபாயாக உட்கார்ந்து வேலை செய்து திரும்பப் பெறவேண்டும். இதையெல்லாம் செய்யத் தயாராக இருந்தால் தான் பெட்டிக்கடை வைப்பது பற்றி யோசிக்கணும்.

தொழில் ஆசை

நண்பர் கிளம்பும் போது சொன்னார். “இந்த வேலையில் நான் போட்ட உழைப்பைச் சொந்தத் தொழிலில் போட்டிருந்தால் எங்கோ போயிருப்பேன்!”

வேலையில் சலிப்பு வருகையில் நம்மில் பலர் ‘என்ன வேலை இது? இதுக்குச் சொந்தமாக நாமே ஏதாவது பண்ணினால் என்ன?” என்கிற எண்ணம் வருவது இயல்பு. இன்று பலர் நாற்பதுகளில் தனியாக ஆரம்பிக்கும் எண்ணத்தைக் கொண்டுள்ளனர். சிலர் வேலை செய்கையிலே தொழில் பண்ண முடியுமா என்றும் யோசிக்கின்றனர்.

வேலையா தொழிலா என்ற குழப்பத்தில் உள்ளவர்கள் பலர். அவர்கள் பிரச்சினை என்ன? வேலைக்கான ஸ்திரத்தன்மையும் வேண்டும். தொழிலில் உள்ள வளர்ச்சியும் வேண்டும். இந்த மாறுதலையும் உடனே செய்ய வேண்டும்.

வேறு வேறு திறன்கள்

நம்மைச் சுற்றி உள்ள வெற்றிக் கதைகளும் நம்மை ஒரே போல யோசிக்க வைக்கின்றன. ஃப்லிப்கார்ட் மூணு வருஷத்தில ஆயிரம் கோடிக்கு மேல போயிருச்சு. ஒரு ஆங்கிரி பேர்ட் கேம் உலகம் முழுதும் சக்கை போடு போடுகிறது. இப்படி வெற்றிக் கதைகள் மட்டும் தான் வெளிச்சத்திற்கு வருகின்றன. ஒரு விதத்தில் இது நம்பிக்கை செய்தியாகத் தெரிந்தாலும் வியாபார உலகின் உண்மைகளை இது உரைப்பதில்லை.

யார் முயற்சி செய்தாலும் வெல்லலாம் என்பது நல்ல எண்ணம் தான். ஆனால் அது எத்தகைய முயற்சி என்பது பற்றி விரிவான பார்வையை அது வளர்ப்பதில்லை.

வேலைத்திறன்களும் வியாபாரத் திறன்களும் வேறு வேறு. ஒரு நல்ல சமையல் கலைஞர் ஒரு லாபகரமான உணவுச் சாலையின் முதலாளியாக மாற முடியும் என்று அவசியமில்லை. பெரிய நிறுவனத்தில் நல்ல மேலாளராக உள்ளவர்கள் பலர் தங்கள் வியாபாரத்தில் நல்ல மேலாளர்களாகச் செயல்படுவதில்லை. காரணம் களங்கள் வேறு. பொறுப்புகள் வேறு.

வேறு வேறு விரக்திகள்

மாதம் பிறந்தால் சம்பளம். விடுமுறைகள் நாட்கள் அதிகம் வந்தால் ஓய்வு கிடைக்கும். நம் வேலையை மட்டும் சரிவரப் பார்த்தால் போதும். இது பணியாளர் மன நிலை. அவரே ஒரு முதலாளி ஆகிவிட்டால் மாதம் பிறந்தால் பணியாளர் சம்பளத்திற்கு வழி செய்ய வேண்டும். விடுமுறை நாட்கள் வந்தால் பணி நாட்கள் குறைகிறதே என்கிற கவலை. தன் வேலையே நிறுவனத்தின் எல்லா வேலைகளையும் பராமரிப்பது எனும் போது பொறுப்புகள் கூடும்.

பணியாளருக்கு ஒரு முதலாளியைத்தான் திருப்திபடுத்த வேண்டும். நீங்கள் ஒரு தொழி புரிபவர் என்றால் ஒவ்வொரு வாடிக்கையாளரும் முதலாளி தான். அதனால் பணியில் ஏற்படும் விரக்தியை விட வியாபாரத்தில் விரக்தி ஏற்பட அதிக வாய்ப்புகள் உள்ளன.

தன்னம்பிக்கை முக்கியம்

வேலையில் சஞ்சலப்பட்டு வியாபாரத்தைச் சிந்திக்காதீர்கள். எது வந்தாலும் தாங்கும் உறுதிதான் வியாபாரத்தில் ஈடுபட முதல் தகுதி. ஆரம்ப காலத்தில் வருமான இழப்பைத் தாங்க வேண்டும். வேலையில் உள்ள சமூக அந்தஸ்தை தற்காலிகமாக இழக்க நேரலாம். உங்களைப் போல உங்கள் குடும்பமும் கொஞ்சம் சிரமங்களை அனுபவிக்க வேண்டி வரும். அவர்கள் அதற்குத் தயாராக இருக்கிறார்களா என்று முதலில் தெரிந்து கொள்ளுங்கள்.

திரும்ப வேலைக்கு வந்தால் சில வேலைகள் கிடைக்கக் கூடியவை. சில வேலைகளை விட்டால் மீண்டும் பெற முடியாது. அதனால் வியாபாரம் என்பது முயற்சி செய்து பார்க்கும் விஷயம் அல்ல. அது ஒரு வாழ்க்கை முடிவு.

தனியாகத் தொழில் செய்யத் துணிந்து ரிஸ்க் எடுக்கும் மன நிலை, எது வந்தாலும் உறுதியான மனம், மிகுந்த தன்னம்பிக்கை மிக மிக முக்கியம். தெரிந்த தொழில், அதில் ஓரளவு நேரடி அனுபவம், வழி காட்டத் தொழில் துறை ஆசான்கள், வங்கி போன்ற ஸ்திரமான அமைப்பில் குறைந்த வட்டியில் கடன், நீண்ட காலத் தொழில் திட்டம், அனுபவஸ்தர்களை மேலாளர்களாகக் கொள்ளல் போன்றவை உங்கள் தொழில் முயற்சிக்கு உதவும்.

இதற்கெல்லாம் தயார் என்பவர்கள் வேலையிலிருந்து சொந்தத் தொழில் செய்ய மெல்ல அடி மேல் அடி எடுத்து வையுங்கள்.

லட்சத்தில் ஒருவர்

ஒரு சினிமாப் பாட்டில் வியாபாரக் காந்தம் ஆகும் கனவைக் கலைத்து நிஜத்திற்கு வாருங்கள். லட்சக்கணக்கான உயிரணுக்கள் தோற்று ஒன்று ஜெயிப்பது போல லட்சத்தில் ஒன்றுதான் தொழில் வெற்றியும். அந்த ஒருவர் நீங்களாகவும் இருக்கலாம்.

தொழில் ஆசை இருந்தால் வேலையில் இருக்கும் போது கனவு காண்பதுடன் உங்களைத் தகுதிப்படுத்திக்கொள்ளுங்கள்.

டாக்டர். ஆர். கார்த்திகேயன்

தொடர்புக்கு:gemba.karthikeyan@gmail.com

ரிஸ்க் எடு, கொண்டாடு!

ரிஸ்க் எடுக்கிறது எங்களுக்கு ரஸ்க் சாப்பிடுற மாதிரி… என்று நிஜ வாழ்க்கையில் துணிந்து செயல்படுபவர்கள்தான் ஜெயிக் கிறார்கள். இன்று தொழிலதிபராக உள்ள அனைவரும் இந்த ரகத்தினர்தான். இந்தப் பட்டியலில் நீங்களும் சேர விரும்புகிறீர்களா? அப்படியெனில் இந்தத் தொடர் உங்களை மெருகேற்றும்.

வேலை செய்ய பிடிக்கல, நாலு பேருக்கு வேலை கொடுக்கணும் இதன் மூலம் சமுதாயத்தில் சிறிதளவு மாற்றத்தை ஏற்படுத்த வேண்டும் என்ற உத்வேகம் இருந்தாலே போதும். தொடர்ந்து படியுங்கள்… தொழிலதிபராகுங்கள்.

இந்தியாவின் எழுச்சியை இரு கட்டங்களாக அதாவது தகவல் தொழில் நுட்ப வளர்ச்சிக்கு முன் (ஐ.டி.மு), வளர்ச்சிக்குப் பின் (ஐ.டி.பி) என பிரிக்கலாம். தொழில் தொடங்க வேண்டும் என்றால் கோடிக்கணக்கில் முதலீடு தேவை என்பது அந்தக்காலம். புதிய உத்தியோடு தொழில் தொடங்க வேண்டும் என்ற தீவிர உத்வேகம் இருந்தாலே போதும்.

கடந்த இரண்டு, மூன்று ஆண்டுகளாக தகவல் தொழில் நுட்பத்தில் ஏற்பட்ட அபரிமிதமான வளர்ச்சியின் விளைவாக தொழில் தொடங்க வேண்டும் என்ற உத்வேகம் இளைஞர்களிடையே இப்போது அதிகரித்துள்ளது டாட் காம் வீழ்ச்சி ஏற்பட்ட காலத்தில் கூட மேக்மைடிரிப்.காம் நிறுவனத்தின் தீப் கல்ரா, நௌக்ரி.காம் நிறுவனத்தின் சஞ்சீவ் பிக்சந்தானி ஆகியோர் பொதுப் பங்கு வெளியிட்டு வெற்றிகரமாக வலம் வந்தது இளைஞர்களின் ஆசைத் தீயில் நெய் வார்த்தது.

மைக்ரோசாப்ட், ஃபேஸ்புக் போன்ற நிறுவனங்கள் அனைத்துமே பலரால் தொடங்கப்பட்ட நிறுவனங்கள் அல்ல. ஒரு நபரின் தீவிரமான முயற்சியின் வெளிப்பாட்டில் விருட்சமாக வளர்ந்தவை இவை. அதற்காக நீங்கள் மைக்ரோசாப்ட், ஃபேஸ்புக் போன்ற நிறுவனங்கள் தொடங்க வேண்டும் என்று அவசியம் இல்லை. உங்கள் சிந்தனையை எவ்வளவு விரைவாக செயல்படுத்துகிறீர்கள் என்பதில் அடங்கியிருக்கிறது முன் னேற்றம்.

புத்திசாலித்தனம், அதிர்ஷ்டம், முறையான படிப்பு, கடின உழைப்பு அல்லது அனுபவம் இவற்றில் எது தொழிலதிபராக்க உதவும் என்று நினைக்கிறீர்கள். கடின உழைப்பாளி, எம்பிஏ படிப்பு முடித்தவர், புத்திசாலி ஆகியோர் உருவாக்கிய நிறுவனங்கள் நொடித்துப் போயுள்ளன.

அதேசமயம் மிகப் பெரும் தொழில் சாம்ராஜ்யத்தை உருவாக்கிய திருபாய் அம்பானி, அருண் ஐஸ் கிரீமால் தமிழக மக்களை குளிர்வித்த என்.ஜி. சந்திரமோகன், பிரியாணி சுவையில் பலரைக் கட்டிப்போட்டுள்ள தலப்பாகட்டு பிரியாணி உணவகத்தைத் தொடங்கிய நாகசாமி நாயுடு ஆகியோர் வெற்றி பெற்றுள்ளனர். இவர்கள் அனைவருமே முறையாகப் படிக்காதவர்கள்தான். எனவே தொழி லதிபராவதற்கு முறையான படிப்பு அவசியம் இல்லை என்பதை இவர்கள் உணர்த்தியுள்ளனர். எனவே சிறந்த தொழிலதிபராக உருவாக கண்ணுக்குப் புலப்படாத பல விஷயங்களை நீங்கள் அறிந்து கொள்ள வேண்டும்.

எதையும் கற்றுக் கொள்ள வேண்டும் என்ற திறந்த சிந்தனையோடு இருக்கவேண்டும். மாற்று யோசனைக்கு செயல் வடிவம் கொடுக்க முற்பட வேண்டும். தொழில் முனைவோராக வேண்டும் என்ற உத்வேகமே உங்களை கோடீஸ்வர தொழிலபதிபராக்கும் என்பதில் சந்தேகமில்லை.

தொழில் முனைவோராக என்ன தேவை?

1. நீங்கள் அளிக்கும் சேவை (Service) அல்லது தயாரிக்கும் பொருள் (Product) எந்த பிரிவினருக்கானது என்பதை அடையாளம் காண வேண்டும்.

2. நீங்கள் அளிக்க உள்ள சேவை அல்லது பொருள் சம்பந்தப்பட்டவர்களின் பிரச்சினையைத் தீர்க்கக் கூடியதா என்று சிந்திக்க வேண்டும்.

3. பிரச்சினையைத் தீர்க்க அவர்கள் பணம் செலவிடத் தயாராக இருக்கிறார்களா என்பதை ஆராய வேண்டும்.

மூன்று கேள்விகளுக்கும் ஆம் என்ற பதில் கிடைத்தால் நீங்கள் தொழில் தொடங்குவதற்கு பச்சை கொடி காட்டி விட்டார்கள் என்று அர்த்தம். சரி அடுத்தகட்டமாக நீங்கள் தயாரித்த பொருள் அல்லது சேவை எந்தப் பிரிவினருக்கானது என்று அடையாளம் கண்டீர்களோ அவர்களிடம் சென்று அந்த சேவை அல்லது பொருளின் தேவை குறித்து விசாரிக்க வேண்டும்.

உங்களது தயாரிப்பு, சேவைக்கு அவர்கள் மத்தியில் வரவேற்பு இருந்தால் போதும் நீங்கள் அடுத்த கட்டத்தை நோக்கி முன்னேறலாம். சமீபத்தில் 83 நாடுகளைச் சேர்ந்த இளைஞர்களின் தொழில் முனைவு சிந்தனைக்கான இறுதி போட்டியில் வெற்றி பெற்றது தமிழக இளைஞர்களின் சிந்தனைதான்.

தென்னாப்பிரிக்காவிலிருந்து இந்தியா வுக்கு மருத்துவ சிகிச்சைக்காக வரும் நோயாளிகளுக்கு உதவுவதற்காக வாட்ஸ்அப் போன்ற புதிய சேவையை இவர்கள் உருவாக்கியதுதான். வழக்கமான தொழில்களிலிருந்து மாற்றி யோசித்தாலே தொழிலின் முதல் படியில் நீங்கள் ஏறுகிறீர்கள் என்று அர்த்தம். விரைவிலேயே தொழில் உங்கள் வசமாகும்.

- கே.சுவாமிநாதன் 

aspireswaminathan@gmail.com